Новым заступником у выборі за Русинів є Мінчіч

Днесь, 28-го януара 2016-го р., в просторах Уярду влады Словацькой републікы проходили выборы заступника членів Выбору про народностны меншыны і етнічны ґрупы за русиньску народностну меншыну. Кандідата могли пропоновати орґанізації, котры доказательно анґажують ся в підпорі всокочіня і розвитку індентічности і културы русиньской народностной меншыны. Інформує о тім сайт повіреной задачами уповномоченого влады Словацькой републікы про народностны меншыны і етнічны ґрупы.

Як заступник членів Выбору про народностны меншыны і етнічны ґрупы за русиньску народностну меншыну быв зволеный Юдр. Владимір Мінчіч, Пгд. 29-річный Владимір Мінчіч є русиньскый правник, котрый походить із Стащіна, в окресі Снина. Жыє в Братіславі і передавать лекції на універзіті. Так само брав участь на дакілько леґіслатвівбых процесах на Словакії. Є членом Округлого стола Русинів Словеньска.

Доповнюючі выборы заступника днесь проходили на основі того, же єден із членів Выбору про народностны меншыны і етнічны ґрупы Мілан Мнягончак зо здравотных причін абдіковав із функції члена в новембрі 2015-го року.

В смыслі штатуту Выбору про народностны меншыны і етнічны ґрупы, народностны меншыны і родову рівность і на основі взаємного договору заступників Петра Медвідя і Мілана Піліпа, на увольнене місце рядного члена Выбору про народностны меншыны і етнічны ґрупы наступив Мілан Піліп, котрому повірена уповномочена влады про народностны меншыны Марія Єдлічкова дня 17-го децембра 2015 р. святочно передала декрет о менованю. Піліп заступать русиньску народностну меншыну вєдно із далшым рядным членом Яном Ліпіньскым. Мінчіч буде заступником до кінця рядного функчного періоду выбору вєдно із Медвідьом.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА