О. A. Бараньчук – Чловеком Рока?

О. Аркадий Бараньчук, православний священник з Ґладышова, нашол ся серед номінуваных XXIV Плебісциту Чловек Рока 2015, орґанізуваного «Краківском Ґазетом». Його цілю єст вказаня чловека, котрий свойом роботом і позапрофесийныма діянями влинул на наше жытя в протягу минулого рока. То передовшытком вказаня тых осіб, якы зміняют нашу околицю – промоция найліпшой маркы.

Кандидатуры номінуваных зголосили чытачы «Краківской Ґазеты». Того рока пелбісцит буде проходил в двох етапах. Найперше будут выбраны лавреаты з реґіонів, а пак – на воєвідскым рівни –  оголошена буде десятка лавреатів – Чловек Рока 2015.

В обшыри «Ґорлицкой Ґазеты» мож голосувати на єденадцет осіб, серед котрых найдеме реставраторку, пожарників, шолтыску, любителя потягів, дириґентку хору, директора стаднины, або дохторку. Але єст тіж медже нима особа, яка о каждій порі дня і ночы єст готова нести поміч і коли дакому діє ся біда, єст в силі станути на голові, жебы напр. передати медычну апаратуру. То чловек, для котрого не важне єст віроісповіданя, нацийональна приналежніст, походжыня, або соспільний статус. В каждым видит свого ближнього і мат для него великє милосердя. Том особом єст о. Бараньчук, парох парафій в Ґладышові і Ждыни (вшыткых душпастырскых пунктів мат штырі, окрем ґладышівской і ждыньской – церкви в Реґєтові і Конечні), основатель і директор oсередка, під опіком котрого находят ся предшкільны діти, особы в тяжкій ситуациі, індваліды, хворы, а тіж бездомны – в Елеосі доступных єст 5 хороненых мешкань. Отец орґанізує варштаты трудотерапіі, регабілітацийны турнусы, спортовы занятя, краєзнавчы і рекреацийны прогулькы для своіх підопічных, вшелеяко підпорює місцеву соспільніст. В 2015 році о. Бараньчук зачал розбудову осередка – в новій части мат быти оснований Дім Соспільной Опікы.

За тым мотузком можете дати свій голос на о. Аркадия і – хоц сам бесідує, же не потрібны му нагороды – вказати, же доціняме його труд, стараня і легкіст, з яком обділят добром інчых, навет в тяжкых жытьовых обставинах приносячы ім бодай кус радости. Голосуваня інтернетовом дорогом буде тырвало лем до 8. лютого/фебруара 2016 р.

Гев можете выслухати архівальне інтервю з о. Бараньчуком з 2013 рока, з якого можете дознати ся о початках осередка і плянах на будуче. Декотры зних ся актуальні реалізуют, а другы уж ся довершыли.