Oбізрий цілу серию Літніх Семінарів з карпаторусиністикы в сервісі YouTube

З огляду на особливу ситуацию, котра утримує ся на цілым світі од яри тр., множество інституций змушене было одкликати плянуваны ініциятивы або зреалізувати іх в інчій формі. Протягом літа Carpatho-Rusyn Research Center орґанізувал онляйновы семінары для заінтересуваных русиньском історийом, языком і культуром. Серия доповіди доступна є в сервісі YouTube.

Шіст полных семінарів найвызначнійшых науковців Пілнічной Америкы мож одслухати в свобідным моменті. Лекциі доступны сут безплатно в сервісі YouTube. Участ в семінарах протягом літа вымагала скоршой реґістрациі, тепер маме іх на вытягніня рукы. Доповіди поділены сут на дві темовы ґрупы – перша тыкат великых персон американьскых Карпатскых Русинів, а друга того, што то значыт быти Карпаторусином в Америці.

Першый з сериі то выклад проф. Павла Роберта Маґочія про Григория Жатковича. Науковец з Університету в Торонто представил нову біоґрафію вызначного політика, якій был першым ґубернатором Підкарпатской Руси.

Лектором другого семінара є др Ніколяс Купеньскій з Академіі Воєнно-Повітряных Сил Зъєднаных Штатів Америкы. Оповіл він про Емілия Кубека – грекокатолицкого священника, писателя, автора церковнославяньско-мадярско-росийско-німецкого словника. Ніколяс Купеньскій од пару років веде проєкт, привертаючый памят о великым Русині, названый The Emil Kubek Project.

Третьом персоном, о котрій мож ся дознати вельо нового, є мама Енді Варголя – Юлия. Прелекцию веде проф. Елейн Русинко з Університету Мариланда в Бальтімор. В доповіди не бракує і тем звязаных з самым мастером поп-арту.

Дальша доповід і бесіда тыкат тлумачыня др Патрициі Крафчык на анґлицкій язык книжкы з русиньскыма приповідками пн. «В сімдесятій семій краіні», в котрій были опубликуваны приповідкы вызначного русиньского фольклористы Михала Гіряка. Адаптацию до сучасного русиньского языка зробил Штефан Сухій (м.ін. лавреат Преміі Александра Духновича за русиньску літературу), а авторком ілюстраций єст Анна Ґайова, малярка.

Пятый семінар посвяченый был темі, што тыкала того, як то є выховувати ся як Карпаторусин в Америці. Дискутували Майкель Больдс, Іфетайо Больдс-Джейкоб, Мария Сільвестрі та Бетанія Сромскій, а бесіду модерувал др Нік Купеньскій.

Послідній семінар вюл др Богдан Горбаль з Нюйоркской Публичной Бібліотекы, якій є Куратором Славяньскых і Східньоевропейскых Колекций Бібліотекы. Підповідат він м.ін., де мож найти русиньскы місця в самым Ню Йорку.

Реалізация вшыткых семінарів можлива была завдякы підпорі і спілпраци Carpatho-Rusyn Research Center з John & Helen Timo Foundation.

На каналі John & Helen Timo Foundation можете так само найти інчы іх реалізациі, а то документальны фільмы про історию Русинів: Перемінены през Талергоф, Аж і слезы не старчыли та Воскресеніє Народа.