Оборона докторской працы о. Аркадия Баранчука

Як подає офіциялньний сайт ПАПЦ orthodox.pl, 13. липця т.р. на Християньскій Богословскій Академіі в Варшаві одбыла ся оборона докторской працы о. Аркадия Баранчука пн. «Православна Церков на териториі білостоцкого воєвідства в роках 1944-1956». 

О. Аркадій Баранчук народил ся в 1973 році на Підляшу. В 1992 році скінчыл загалноосвітній ліцей, здаючы матуральний іспыт а пак закінчыл православну семінарию. В квітни 1998 рока зачынат ся священничий пут о. Аркадия на Лемковині. Товды же, владыка Адам (Дубец) рукоположыл о. Аркадия Баранчука і направил на парафіі Ґладышів (з філийом в Реґєтові) та до парафіі Ждыня (з філийом в Конечні).

В 2001 році, з благословліня архієпископа Адама, оснований был Православний Осередок Милосердя Елеос, котрий побудуваний был під оком і великым старунком о. Аркадия. Його діяльніст не завершат ся лем до православных вірных, бо каждому, кого треба сперти і зверне ся до Елеосу, ґладышівскій парох все старат ся помочы. Днес, простір діяня осередка то орґанізуваня занять і таборів для неполносправных діти і дорослых, а од 2002 рока тіж безлпатна выпожычальня інвалідскых візків, регабілітацийных постели і інчого медычного ґратя. О. Акрадий Баранчук, разом з вірныма, піднял ся труду збудуваня церкви в Реґєтові в лемківскым архітектонічным стилю, котра была посвячена в 2012 році.

За свою діяльніст і працу на хосен Церкви о. Аркадий Баранчук остал в 2009 році нагороджений через владыку Адама почестном грамотом, в 2012 році ордером св. Мариі Магдалины III ступеня, а в 2014 році бронзовым Крестом Заслугы через Президента Польской Республикы Броніслава Коморовского.

Ґратулюєме обороны докторской дисертациі і желаме Вам, отче Аркадию, вшыткого доброго в дальшій, хоц тяжкій, але успішній діляльности на хосен Церкви і нашого Народу!