Од днес роботы во Фльоринці. Закрыта дорога з Фльоринкы через Брунары в сторону Ізб

Од днес, 28. листопада/новембра, до 7. грудня/децембра во Фльоринці сут ведены роботы, повязаны з одбудовом знищеной через осуніня землі повітовой дорогы. Ремонтова екіпа має за задачу привернути єй давный стан. Положене буде нове бітумічне вкрытя. В тым часі пут з Фльоринкы через Брунары, котра веде до Ізб, якы сут граничным селом, буде закрыта. Орґанізуваны сут объізды.

Хоц дорога буде закрыта на даякій час, то жытелі поблизкых сел сут задоволены, што вкінци буде модернізувана. Пут постепенно заваляла ся од парох місяців. Земля, котра находила ся під асфальтом, што кус, за справом злив і воды, осувала ся до корыта поблизкой рікы Білой. Доднес дорога такой в 50% была знищена.

Причыном єст поблизка ріка Біла, котра підмыла дорогу. Як реляцийонуют специялисты, проблем реченой дорогы не єст новый. Што даякій час положеный на пути асфальт зачынат пукати, в наслідстві чого дорога нищіє, а земля ся зачынат осувати. В тым місци од парох місяци веденый был наперемінный рух, понеже єдна зо смуг руху была доцяп забрана через Білу.

Перед роками народили ся пляны, жебы спомянутый тракт з Фльоринкы, через Брунары до Ізб повести другым берегом рікы Білой і побудувати гын два мосты, жебы оминути проблематичный ґрунт. З думкы заєдно зрезиґнувано з причыны калькуляциі великых коштів. Дорога з Фльоринкы, котра веде через Брунары, Снітницю, Баницю і Ізбы аж ґу границі, то історичный пут, тзв. «цисарка», котра была вызначена перед Великом Войном.

Од днес закрыта єст дорога но. 1503 од крижівкы з повітовом дорогом но. 1504 з Фльоринку на Ропу, через Вафку. Объізды, напримір до одвиджаной туристами Высовы, будут зато ведены дорогом на Вафку. Дотля мож было ходити через Снітницю на Чарну і Ганчову, або на Ставишу і Ріпкы.

Парунадцет метрів дальше од ремонтуваного днес одтинка, модернізувана лем два рокы тому дорога так само зачала уж пукати. Тота част пути являт ся вынятково проблематична для заряджаючых і ремонтовых екіп, єден ремонт тілько што ся кінчыт, а уж треба зачынати другій. Ремонт має ся пляново скінчыти 7. грудня/децебра тр.