Од заране «Світ під Кычером»

Лемківскій Ансамбль Пісні і Танця «Кычера», як головний орґанізатор, просит на 21. едицию Медженародного Фольклорного Фестівалю «Світ під Кычером», котрий уж другу декаду проходит там, де прожывают Лемкы – на чужыні, а декотры з едициций приходят з выступаючыма і на Лемковину. Тогорічний фестіваль зачне 29. червця/юнія і тырвал буде до 12. липця/юлия.

21. едиция то концерты в девятьох місцевостях Нижнього Шлеска і двох місцевостях Лемковины. Тот рік Лемкы запросили до себе фольклорны ансамблі представляючы нацийональны і етнічны меншыны з девятьох держав світа. Выступлят ґрупы з Румуніі, Альжыру, Непалю, Іспаніі, Украіны, Словациі, Чешской Республикы, Арґентины ай Колюмбіі. Не бракне і домашніх польскых і другых лемківскых колективів.

Нижньошлезска част то концерты запоряд в Свидници, Хоцянові, Лісци, Намыслові, Ліґници, Волові, Рудній, Заменицях. Окрем того поєдны колективы будут выступувати в находячых ся близко векшых міст селах, де запрезентуют свою нацийональну культуру. Місця, в котрых проходят ґальовы концерты і дальшы анімациі, од самого початку сут так добераны, штобы еґзотичны ансамблі дотерали предовшыткым там, де жыют Лемкы.

Лемківска част фестівалю «Світ під Кычером» зачне ся 10. липця/юлия хороводом і концертом на ґорлицкым рынку. Того самого дня будут анімациі в Санковій. Другій і третій ден малопольской части то концерты в Креници. Перший концерт пройде пн. «Лемкы і іх гості для Крениці». Другого дня приіздны колективы поклонят ся Епифанови Дровнякови – Никыфорови Криницкому, котрого в 2018 р. припоминана є 50. річниця смерти.