Одбуде ся громада Піттсбурзькой митрополії

Ахієпіскоп і митрополіта піттсбурзькый владыка Вільям Шкурла і Рада єрархів Піттсбурзькой візантійской католицькой митрополітной церькви буде гостити од 2-го до 5-го новембра 2023-го року 3-тю громаду Піттсбурзькой митрополії.

Громада одбуде ся в Храмі Пречістой Дівы Марії в Гіллсборов, Ню Джерсі. Темов громады є Жыти нашу віру: Рушати ся допереду, цінити наше минувше. Митрополітна громада буде розділена на темы про духовных, і темы про віруючіх лаіків.

Три цілі

Як інформує офіціалный сайт митрополітной громады, слідують ся три цілі. По перше, звекшыти знаня і цінити собі історію візантійской русиньской церькви в „Старім краю“ і в Споєных штатах Америкы, як і візантійску русиньску културу а уменя.

Другым цільом громады є дізнати ся о провіреных поступах, котры днесь існують в парохіях Піттсбурзькой митрополії, і котры помагають роснути комунітам віруючіх, з надійов, же участны запровадять тоты практікы до своїх актівностей на парохіях.

Третім цільом подля офіціалного сайту є зробити конкретны крокы, жебы забезпечіти будучность і роснутя тамтешной Церькви. Сінодална стріча має тоты три темы за найважнішы.

Прийдуть і цінны гості

Митрополітна громада, на котрій по реґістрації можуть брати участь і віруючі лаіци, буде мати інтересный проґрам і цінных гостів.

Як інформує офіціалный сайт, културный аспект громады будуть представльовати презентації професора Павла Роберта Маґочія, котрый буде бісідовати о основателях Візантійской католилцькой (ґрекокатолицькой) церькви в Америці. Митрополія інформує, же його книжка Нашы люди: Карпатьскы Русины і їх потомкы в Северній Америці (оріґ. Our People: Carpato-Rusyns and Their Descendants in North America) якраз вышла в новім розшыренім выданю.

Маґочій має презентовати і уменя а културу русиньского народа, причім орґанізатор авізує, же занедовго має быти выдрукована книга Маґочія о умелцях Підкарпатьской школы мальованя.

Отець Хрістофер Зуґґер буде занимати ся історійов Візантійской католицькой церькви в Америці. Слідучій рік буде сто років од приходу Василія Такача, першого єпіскопа Візантійской русиньской католицькой церькви в Америці.

Отець Зуґґер є автором двох книг, Забыты: Католици Совітьской імперії од Леніна через Сталіна і Гляданя скрытой Церькви. Його третя книга занимать ся історійов Візантійской русиньской церькви од їй основаня аж по сучасность і выйде в новембрі.

Участным має быти і кардінал Тімоті Долан, римокатолицькый архієпіскоп ню-йорьскый, котрый має мати свій прояв на одкрываючій вечері в пятніцю. Меджі оголошеныма гостями є і владыка Ніл Лущак, апостольскый адміністратор Мукачовской єпархії, котра є про нашы церьковны штруктуры, якы вышли з Ужгородьской унії, Матірьов Церьквов.

Образы і музика

Участны почас громады будуть годны видіти і збірку образів підкарпатьскых малярів, котру властнить Єпархія Пассаік. Позната в русиньскім русі актівістка Марія Сілвестрі буде кураторков той выставы, в рамках котрой буде мож видіти образы Адалберта Ерделія, Йосифа Бокшая і далшых.

Кедьже музика і танець мають вызначну роль в културній дідовизні карпатьскых Русинів, навщівници будуть мати можливость быти і на суботнім ґалавечорі, де не буде браковати музика ці традічны стравы. Заграти русиньскы співанкы прийде ґрупа Пайташы із Словакії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА