Одбыла ся конференція на тему інформованя в меншыновых языках

6-го октобра 2021-го року одбыла ся в Сербії онлайн конференція на тему Публічне інформованя в языках народностных меншын з погляду запродваджаня Медіалной стратеґії. Інформовала о тім аґентура Рутенпрес.

Конференцію орґанізовало выдавництво Руске слово з підтримков Місії Орґанізації про безпечность і співпрацу в Европі (ОБСЕ) в Сербскій републіці, Незалежного здружіня новинарів Сербії і Незалежного дружства новинарів Бойводины.

На конференції бісідовало ся о значіню інформованя в языках народностных меншын. Резултаты з ньой будуть значучі при дефінованю Медіалной стратеґії, як і при леґіслатівнім паклику в области інформованя в меншыновых языках.

В другій части бісідовало ся о Інтернім етічнім кодексі, котрый ініціовав і реалізовав директор выдавництва Руске слово Борис Варґа.

Кодекс є піонірьсков ініціатівов русиньской меншыны в медіалній сістемі Сербії, і є частьов Акчного плану Стратеґії розвитку сістемы публічного інформованя у Сербскій републіці на період років 2020 аж 2025.

Меджі участниками конференції быв і шеф Місії ОБСЕ Ян Брату, державный секретарь Міністерства про людьскы права, права меншын і соціалный діалоґ Олена Папуґа, окрема радкыня Міністерства културы і інформованя Ґордана Предіч, председа Націоналного совіту Русинів Борислав Сакач, як і далшы представителі русиньской меншыны, націоналных совітів ці меншыновых медій.

В заключінях конференції ся пише, же треба глядати можливости про стімулацію інформованя в мешныновых языках ці запровадити моніторінґ медіалной продукції. В рамках Інтерного етічного кодексу заключіня были в напрямі дефініції ясных граніць і односин меджі меншыновыма медіями і націоналныма совітами ці дефініції санкцій в припаді недотримованя кодексу.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА