Голосник

Одбыв ся далшый річник Походу вдякы Дукля – Чертіжне

Памятку павшых у Другій світовій войні і тот рік припомянули собі в селі Чертіжне Меджілаборецького окресу турістічно-ліжарьсков подійов під назвов Поход вдякы.

На 27-ім річнику події, котрый одбыв ся в суботу 25-го януара 2020-го року брало участь приблизно сто участників. Про словацьку пресаґентуру TASR то потвердив староста Чертіжного Петро Трічак. Наймолодшым участником быв за словами старосты 11-річный хлопець, найстаршым 75-річный пан.

Подля Трічака ся подія за остатні рокы стала атрактівнов і про турістів зо шыршой околіці. Тот рік на поход пришли окрім домашніх і люди з Левочі, Пряшова, Кошыць і Чеськой републікы.

Траса Походу вдякы зачінать коло Памятника чехословацького армадного корпусу на Дуклі, де собі участны припоминають павшых вояків положіньом вінця, далше веде турістічнов стежков по словацько-польскій граніці. З Чертіжняньского сідла продовжують участны до села на ліжах. Ціла траса має приблизно 15 кілометрів.

Село Чертіжне в співпраці зо Шпортовым клубом Кычара подію выголошує на послідню януарову або першу фебруарову суботу, што залежыть од погоды. Но як староста про аґентуру повів, абсолвованя туры собі намагу выжадать за каждой погоды. Додав, же свойов намагов давають почливость павшым у Другій світовій войні.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі