Одкрыли експозіцію Михала Стренка

Під замком в Старій Любовні в пятніцю 1-го юна 2018 дополідне святочно одкрыли Воєньску експозіцію Михала Стренка. Як словацьку державну пресову аґентуру TASR Браніслав Ільковіч, самопомічно єй выбудовала безпрофітова орґанізація Михала Стренка, котрой є Ільковіч директором.

Выставка окрім представліня особы Михала Стренка понукать можливость перейти ся по єднинім вірно выбудованім закопі на Словакії в цілковій довжці 100 метрів і видіти дакілько підземных бункрів. Навщівници експозіції можуть посмотрити собі і збрані, головно з періоду Другой світовой войны.

Експозіція має подля Ільковіча велике значіня. Хоче вказати на крутость войны, але і честь і геройство ці припомянути родаків з реґіону котры вмерли в Другій світовій войні, і котры были у протифашістічнім одбої.

Михал Стренк

Стренк ся народив 10-го новембра 1919 р. в русиньскім селі Орябина, окрес Стара Любовня, і кідь мав шість років з родічами одышов до Споєных штатів Америкы. Закінчів середню школу в Пенсілванії, робив робітника при будованю драг і в октобрі 1939 р. ся приголосив до наморной піхоты (маріняци).

Барз скоро ся в боях освідчів і дістав шаржу сержанта. В році 1944 го як велителя одділу післали до боя о стратеґічный пункт – остров Іво Джіма. Америчане го заатаковали в повній силі, но высадити ся зо шыфы ся їм подарило аж во фебруарі 1945-го року. Під веліньом Стренка, на выгаснутій сопці Маунт Сурібачі, підняли америцькый флаґ. Піднятя флаґу фотив фотоґраф аґентуры Associated Press Джов Росентал. За фотоґрафію пізніше здобыв Пуліцерову премію. Фотоґрафія стала ся сімболом перемогы, хоць Стренк не дожыв ся ани дефінітівного покоріня острова. Тыждень по піднятю флаґу, 1-го марца 1945-го року, го засягнув шрапнел із америцькой шыфы почас того, як рисовав до піску план далшой акції. По войні было його тіло похоронене із честованями на Арлінґтоньскім народнім цінтері, значіть на місці, де суть похоронены і америцькы презіденты.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА