Одкрыють памятну таблу Діонізови Ільковічови

В Пряшові одкрыють памятну таблу вызначному світовому фізікови русиньского походжіня – Діонізови Ільковічови. Памятна табла буде на будові Педаґоґічной і соціалной академії і святочне одкрытя одбуде ся 4-го септембра о 10.00 год. Тот рік припомянули сьме собі 110 років од народжіня Ільковіча. Авторков таблы є академічна скулпторка Ева Полтфайова – Ільковічова.

Професор Діоніз Ільковіч быв походив зо старого ґрекокатолицького священьского рода Ільковічовых. Народив ся 18-го януара 1907-го року у Шарішскым Щавнику. Його брат, Алексій Ільковіч, быв вызначным русиньскым журналістом.  Ільковіч быв науковцьом світового мена, співосновав Словацьку академію наук, быв деканом Факулты природных наук в Братіславі. Штудовав в Чехословакії, но і у фанцузькім Паріжу.

Ільковіч быв великаном, котрый пояснив вынятковый природный яв і дефіновав го як Закон полароґрафії. Тот закон увів і до жывота. Вышколив цілу ґенерацію науковців і дав великый влкад нелем до словацькой, но і світовой наукы.

Діоніз Ільковіч окрім іншого стояв при зроджіню трьох основных фізікалных інштітутів на Словакії: Інштітуту технічной фізікы Словацькой высокой школы технічной, Фізікалного інштітуту Природознавчой факулты Словацькой універзіты і Фізікалного інштітуту Словацькой академії наук. Із тых інштітуцій ся практічно вывинулы вшыткы далшы фізікалны інштітуції на Словакії.

Діоніз Ільковіч по плоднім професіоналнім жывоті умер 3-го авґуста 1980-го року. О два рокы пізніше, у 1982-ім році, презідія Словацькой академії наук зрядила Честну плакету Діоніза Ільковіча за заслугы у фізікално-хемічных науках. Перед дакілько роками выникла Фундація Діоніза Ільковіча на підпору талантливых штудентів. В Братіславі є по Діонізови Ільковічови названа і уліца на теріторії „академічного містечка“. У 2008-ім році в будові Хемічного інштітуту быв святочно одкрытый рельєф тому основательови словацькой фізікы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА