Голосник

Одслужено панихіду на гробі першого Апостольского Адміністратора Лемковины

Як інформує інтернетовый сайт перемышльско-варшавской архієпархіі Украіньской Грекокатолицкой Церкви в Польщы, в пятницю, 17. липця/юлия 2020 р., была одслужена панихіда на гробі о. дра Василия Масцюха в Новій Веси на Лемковині, котрый был першым владыком Апостольской Адміністрациі Лемковины.

Панихіда была одслужена з ініциятивы о. митр. Юлияна Гойняка, грекокатолицкого пароха Зеленой Горы, котрого рід выходит як раз з Новой Веси. Богослужыня очелил владыка Владимір Ющак, єпископ вроцлавско-ґданьской єпархіі УГКЦ в Польщы, при участи духовных отців.

Наперед присутных привитал о. Гойняк. В памят о. Масцюха молили ся тіж вірны, котры так само мают свій рід в підкреницкій Новій Веси. На закінчыня богослужыня владыка Владимір Ющак спомянул на фукнцийонуваня Апостольской Адміністрациі Лемковины і прикликал особу першого апостольского адміністратора той незалежной церковной структуры, котра была покликана в 1934 р. і приналежала прямо Римови.

В інформацийній ноті, котра явила ся на архієпархіяльным сайті, находят ся фактоґрафічны блуды. Подає ся, што першый Апостольскій Адміністратор Лемковины вмер в 1935 р., а фактично о. Василий Масцюх вмер 12. марця 1936 р. в Рыманові, а його похорон в рідным селі одбыл ся 16. марця 1936 р. Неправильный рік смерти єст так само на нагробній таблици.

Находит ся і друга фактоґрафічна хыба, котра є стрічана барз часто в більшости опрацувань до темы істориі Апостольской Адміністрациі Лемковины. В тексті на сайті пише ся, што Адміністрация істнувала до 1947 р. Така інформация вымагат дополніня, знаме бо, же по выселіню Русинів з Лемковины автоматично перестали фунґувати грекокатолицкы парохіі. Фактично не діяли і адміністрацийны структуры, але офіцияльно ААЛ перестала істнувати аж в 1991 р., што находит потверджыня в церковных документах. Цілый час, іщы в 1990 р. была споминана ААЛ в Annuario Pontificio, як Apostolica Administratio pro Lemkis. З папского альманаху зникнула аж в 1991 р., коли єй територия была офіцияльно передана під перемышльско-варшавску архієпархію УГКЦ.

Лемкы о. Василия Масцюха привыкли называти «владыком», хоц не мал він єпископской хіротоніі. Більше про біоґрафію першого лемківского владыкы чытайте в нашых архівных статях.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі