Одзвукы старославяньского під Кральовов гольов

Село Телґарт і Ґрекокатолицька парафія в Телґарті запрошають на 21-шый рінчик фестівалу вецеголосового храмового і народного співу під назвов Одзвукы старословяньского під Кральовов гольов, котрый ся одбуде в днях 18-го аж 19-го юла 2015 р.

Подія зачне в суботу привитаньом і обчерствіньом гостів коло жрідла Грона. Потім ся гості і выступаючі пересунуть на Кральову голю, де точно о дванадцятій годині зо скалы – найвысшого місця, зазвучіть гімнічна співанка „Na Kráľovej holi“. Проґрам буде продовжовати хоровыма народныма співами в природі, котры будуть співати участны женьскы і мужскы хоры.

Пополідне хоры і навщівници перейдуть до ґрекокатолицькой церькви в Телґарті, де зазвучать храмовы хоровы співы. Вечур буде проґрам продовжовати в Културнім домі, де знова будуть звучати хоровы співы з народнов тематіков.

В рамках недільного проґраму буде одправлена церьковнославяньска Божественна літурґія в містній Церькви Найсвятішой Тройці. Головным служытельом буде преосвященый владыка Петро (Руснак), братіславскый ґрекокатолицькый єпарха.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА