Округлый стіл бы мав у суботу прияти проґрам розвитку

В суботу 2-го мая 215 р. буде в Пряшові проходити вже 15-те засіданя Округлого стола Русинів Словеньска (ОСРС). Засіданя буде тот раз мати дві части – святкову і робочу.

ОСРС має зачаток напланованый на 8.30 год. Членове ся тот раз не стрітнуть в засідалні, но під памятником русиньского будителя Александра Духновіча. Положіньом квітя і приговором собі ОСРС припомяне і почестує 150-ту річніцю смерти того великого діятеля, котра была в марці того року. Потім уж членове ОСРС перейдуть до засідалні, де будуть продовжовати робочов частьов.

ОСРС почас суботнього засіданя чекають дві важны задачі. Кідьже кінчіть маднат цілій презідії русиньской платформы, в тім чіслі і мандат председы, на засіданю будуть проходити вольбы, з котрых буде выбрана нова презідія ОСРС з мандатом на рік, в припаді секратаря і говорцю з мандатом на наступні два рокы.

Іщі важнішов справов засіданя буде голосованя о приятю „Проґраму розвитку русиньской народностной меншыны в Словацькій републіці“. На тім документі членове ОСРС робили од 2012 р., коли платформа была заснована. Документ, котрый бы мав мати коло 8 сторінок є розділеный на пять частей – Народностна самосправа, Школство, Култура, Інштітуції, Села і міста. За окремы части документу были одповідны ґаранты окремых комісій, котры коло ОСРС выникли. Головным коордінатором того проґраму є бывшый председа ОСРС Александер Дулеба. По приятю проґраму буде ОСРС свій документ публіковати.

Окремым дотатком того документу буде і пропозіція Закона о народностных меншынах з ділні Русинів, котру ОСРС хоче дати на верену діскузію і глядати так компроміс на то, жебы такый закон, котрый доднесь на Словакії бракує, быв приятый в словацькім парламенті. В русньскій пропозіції ся рахує із културныма, меншыновыма самосправами, котры бы змінили і сістему фінанцованя і фунґованя народностной културы і школства.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА