Округовий Музей в Новым Санчы в новій сідибі

Округовий Музей в Новым Санчы на початку марця 2018 р. змінил свою головну сідибу. Одтепер музейны власти урядуют в будинку давного банку, што ся находит при ул. Ягайлоньскій 56 в Новым Санчы.

Новий головний будинок новосандецкого музею был куплений малопольскым воєвідством в 2016 р. Адаптацийны роботы переведено з фондів Малопольщы і европейскых дотаций. Од марця в новій сідибі урядуют уж дирекция інституциі та одділіня інвентаризациі, едукациі та адміністрациі і книговіст.

Як інформуют власти музею, по завершыню послідніх аранжацийных прац, внутрі нового будинку будут презентуваны експозициі присвячены головно культуровій дідовизні Сандеччыны та діям Нового Санча. Постійна выстава буде навязувала до істориі самого будинку, якій вознесено в 1912 р. і якій за австрийской монархіі заниманий был банком, та тыкала буде періоду од 1867 р. до початків ІІ світовой войны. Тоты експозициі буде мож обзерати од 27. квітня/апріля 2018 р. А в новым будинку музею доступа є уж інча постійна експозиция з образами знаного сандецкого маляря Болеслава Барбацкого.

Кінцьом серпня/авґуста 2015 р. Округовий Музей в Новым Санчы мусіл лишыти єдну зо своіх філий – ґалерию Стара Синаґоґа, прото што синаґоґу вернено первістным властителям (Конфесийній Жыдівскій Ґміні в Кракові). Музейну збірку перенесено товды до Ґалицийского Місточка, а част працівників перешла до ґалериі Мариі Ріттер. Нова сідиба дає музейникам можніст корыстаня з більшых просторів, в котрых окрем експозиций будут проходити ріжного рода культурны подіі.

Округовий Музей в Новым Санчы был оснований вєдно з покликаньом новосандецкого воєвідства в 1975 році (перше был то Музей Сандецкой Землі). По адміністрацийній реформі в 1999 році, коли то в Польщы поліквідувано меньшы воєвідства, музей стал ся Інституцийом Культуры Малопольского Воєвідства. Музейна діяльніст близка є Лемкам, якы столітями заселяли Сандецку Русь. M.ін. в 1984 році была зрыхтувана выстава «Łemkowie / Лемкы», куратором якой явил ся Антоний Крог. Выстава, як перша в Польщы по 1947 році, переломила табу нт. Лемків, іх культуры, выгнаня. Частю Округового Музею в Новым Санчы є тіж Музей Никыфора – Епифана Дровняка в Креници.