Рік 2020 є Округлым столом Русинів Словеньска выголошеный за Рік русиньского села. В рамках юбілейного року русиньска платформа приготовила дакілько актівностей. Моментално проходить і актівность заміряна на діти.
Од 15-го септембра до 15-го новембра 2020-го року проходить Вытварный конкурз на тему Рік русиньского села.
„Його цільом є мотівовати діти і школярів школ, жебы залучіли ся до конкурзу посередництвом вытварных творів, котры будуть зроблены будьяков техніков і выповідять в них свою позіцію, чутя і усвідомліня собі ідентіты, приналежности ку свому народу і гордости на нього,“ пише ся в штатуті конкурзу.
Конкурз в трьох етапах
Залучіти ся може кажда школа із своїма школярями. Школы выголошують школьскы кола, в котрых выберуть з каждой в рамках трьох віковых катеґорій три найкрасшы творы. Тоты пак заженуть до Основной школы з матерьсков школов у Кленовій, котра є з навчалным языком русиньскым.
Подля штатуту конкурз буде проходити в трьох етапах – школьске коло, окресне коло, цілословацьке коло. До цілословацького кола поступлять три творы з каждой катеґорії, з каждого окресу.
Оціньовати буде фахова порота
В рамках конкурзу є зряджена тричленна порота з области вытварного уменя. Округлый стіл на співпрацу як членів пороты ословив академічного маляря Андрія Смолака, якый має в Снині Ґалерію Андрія Смолака, а окрім іншого у 1994-ім році основав Меджінародный малярьскый пленер і Меджінародный вытварный фестівал в Снині. Так само є основательом двох фундацій – Фунфації ART.EAST на підпору вытварного уменя, і Фундації Кременець на підпору културы Русинів.
Другым членом пороты є академічна малярька Анна Ґайова. Пряшівчане єй можуть знати і вдяка їй ґалерії AG Gallery. В пороті є і Марцела Рунянинова, директорка Основной школы з матерьсков школов з навчалным языком русиньскым в Кленовій. Окрім роботы учітелькы і директоркы школы актівно діє в реґіоні, і намагать ся пробудити русиньске школство до актівного жывота.
Порота буде выберати три вытварны творы з каждой катеґорії, з каждого окресу, котры поступлять до цілословацького кола. Потім з них выбере порота в каждій катеґорії три вітязны творы. Авторы будуть одмінены матеріалныма цінами. Штатут конкурзу можете найти на офіціалнім сайті Округлого стола Русинів Словеньска.
Жрідло фороґрафії: ОЗ Колысочка.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫК
Коментарі