Олексій Петров спомянув Русинів і при своїм одкликаню

В понедільок 15-го новембра 2021-го року Закарпатьска областна рада одкликала з посады дотеперішню голову Олексія Петрова. Депутаты голосовали за одкликаня вже другый раз.

Петров быв у функції од 7-го децембра 2020-го року, перед тым быв головов Закарпатьской областной державной адміністрації. Закрпатьска областна рада го одкликала вже 28-го октобра на своїм реґуларнім засіданю, но Петров втогды назвав засіданя нелеґітімным. Тым зачала політічна кріза.

Наконець быв згодный із своїм одкликаньом із фунцкії, пожадав о то сам, што депутаты зробили вчера на своїм надзвычайім засіданю.

В приговорі спомянув Русинів

Перед своїм одкликаньом ся приговорив депутатам Закарпатьской областній рады. Петров знова непрямо припомянув існованя Русинів.

„Я не єм скушеный політік, як векшына команды, з котров роблю в области, пришов до областной рады. Як звычайный чоловік роблю хыбы і намагам ся їх оправльовати, і не ганблю ся просити о пробачіня,“ повів Петров. „Будьте україньскым Закарпатцьом, україньскым Мадярьом, Русином або Ромом,“ продовжовав дале днесь вже бывшый шеф Закарпатьской областной рады.

Олексій Петров Русинів не споминав першый раз. Бывшый офіцір Службы безпекы Україны русиньску тему вытягнув уж в септембері, по чім быв такой атакованый в областній раді за „політічне русинство“.

Є то европскый вопрос

Зачатком септембра были на Підкарпатю орґанізованы презентації книжкы Павла Роберта Маґочія Підкарпатська Русь: формування національної самосвідомості (1848-1948), яка вышла у Выдавництві Валерія Падяка.

Націоналітсты атаковали Олексія Петрова за то, же была дозволена презентація в Закарпатьскій областній універзалній науковій бібліотеці імени Ф. Потушняка в Ужогорді. Петров втогды на своїм фанпедйжі на сіті Facebook написав, же бібліотека сама рішыть, якы презентації у своїх просторах зорґанізує, і з його боку не видить потрібным вмішовати ся – дозволяти або заборонити орґанізованя подій, покля они проходять цівілізованым способом.

„Покля бісідовати о моїй позіції до так званого русиньского вопросу, є абсолутно европскым – гражданы мають право на самоідентіфікацію, і ани держава, ани орґаны самосправы не мають в тім перешкаджати. О тім бісідує і україньска леґіслатіва,“ написав втогды Петров.

Припоминаме, же Русины суть од 2007-го року в Закарпатьскій области Україны вызнаны як окрема народностна меншына, хоць на цілодержавній уровни ся того доднесь не дочекали.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА