Онлайн конференція памяти Іштвана Удварі

Вседержавне общество русиньской інтеліґенції імени Антонія Годинкы (ВОРІАГ), котре діє в Мадярьску, орґанізує Меджінародну наукову онлайн конференцію памяти професора Іштвана Удварі.

Як інформовала редацкію Маріянна Лявинець, конферецнія буде проходити 5-го децембра 2020-го року на платформі ZOOM. Подія одбуде ся з підпоров Русиньского націоналного самосправованя VI. района в Будапешті. На конферецнії будуть із своїма рефератами выступати такы мена як Михаіл Капраль, Олена Дуць-Файфер, Валерій Падяк, Михайло Фейса, Володимір Фенич, але і далшы учены із мадярьского середовиска.

Хто бы мав інтерес брати участь на онлайн конференції, є треба допереду контактовати модераторку Маріянну Лявинець на імейловій адресі mariann.ljavinecz@gmail.com. Тестованя споїня буде проходити в пятніцю 4-го децембра меджі 18.00 і 19.00 год. Орґанізаторы просять, жебы тоты, котры планують брати участь, выхосновали тото тестованя.

Конферецнія пак буде проходити в суботу. Одкрытя конференції є наплановане на 10.00 год. і конець орґанізаторы становили на 13.00 год. Комплетный проґрам конференції мож найти під статьов.

Славіста і педаґоґ Іштван Удварі народив ся 14-го юлія 1950-го року в селі Торньошпалца в Мадярьску. У 1975-ім році закінчів Універзіту Лайоша Кошута в Дебрецині, доктором філозофії быв од 1986-го року. Професуру здобыв у 1995-ім році. Од року 1997 быв членом Мадярьской академії наук. Удварі од 1982-го року выкладав російскый, україньскый і русиньскый язык на Высшій педаґоґічній школі в Ніредьгазі, де у 1992-ім році засновав Катедру україньской і русиньской філолоґії. Фунґовала до року 2013.

Інтересовав ся аналізов русиньскых текстів, головно тых, котры односны суть ку періоду до 19-го столітя, і котры ся му подарило найти в мадярьскых архівах. Окрім іншого приготовив до друку дакілько томів рукописів русиньского історіка Антонія Годинкы, репрітны выдань букваря Мануіла Ольшавского, букваря Івана Куткы і много далшых. Так само працовав над языком і літературов Русинів Войводины. Професор Іштван Удварі вмер в Ніредьгазі  9-го новембра 2005-го року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА