Карпаторусиньскє Общество в Зъєднаных Штатах Америкы просит на проєкцию фільму Осадне, котра одбуде ся 9. квітня/апріля т.р., в Philadelphia City Institute (1905 Locust Street Philadelphia, PА 19103). Початок подіі од 13.30 год. за локальным часом.
Осадне то вынятковий фільм, вказуючий жытя в невеликым селі Осадне на Пряшівскій Руси. Знимкы до фільму в режысериі Марка Шкопа были зниманы в роках 2006-2009. То екранізация, вказуюча на свій спосіб почутя европейскых стремлінь Русинів, котры сут свідомы подіі, з котром неодолга приде ся ім стрітити. Бесіда о рыхтуваній стрічы тамтышніх найвекшых лідерів европейской політикы зо старостом села Осадне – Владиславом Мікуляшком, православным парохом в Осадным – о. Петром Сороком, та Федором Віцо – культурным діячом і карикатуристом. Початок фільму то пляны привитаня серед Русинів єдного з евродепутатів зо Словациі, котрий пак оставлят в Осадным запрошыня до Европейского Парляменту.
Староста села – Мікуляшко, при своій функциі был уж на тамтот час 36 років. Фільм, окрем головного мотиву – выізду запрошеной русиньской делеґациі до Брукселі, вказує тіж штоденне жытя мешканців Осадного. Видиме там сцены з сельской корчмы, похорону, крестин і яруваня поля на ґаздівці. Піднесены сут важны демоґрафічны проблемы, котры здавают ся тыкати русиньскых сел, розсіяных по сілій Карпатскій Руси. О. Петро Сорока, за послідніх пят років свойой послугы поховал 50 осіб, а до крещыня за тот час триманы были лем два отрочата. Напротив тому хотят выйти староста і священник, свідомы того, же будуче села то м.ін. туристичний рух. О поміч звертают ся до Федора Віцо. Творячы триособову делеґацию, ідут до Европейского Парляменту в Бруксели, де, одвиджаючы при нагоді найважнійшы місця той інституциі, стрічают ся з політиками, котрым презентуют своі погляды, маючы на ціли ратувати Осадне.
Осадне то русиньскє село, котре находит ся в окресі Снина, 17 км од сучасной польско-словацкой границі. Першы історичны інформациі про село походят з 1639 рока, а в 1910 році в селі прожывало 664 люди. Подля статистичных даных (за 2014 рік), в селі жыє 170 осіб. В Осадным находят ся грекокатолицкій та православний храмы. В тым другым, поміщена єст крипта з мощами около 1600 росийскых вояків з часів І Світовой Войны, котры згынулы вчас неуспішной карпатской експедициі ґен. Корнилова. З Осадного до лемківского села Бальниця веде туристичний пут.
За тым мотузком можете пізрити на фотоґалерию зо зниманя сцен до фільму.
Коментарі