В вересни/септембрі зачне ся VI eдиция Малопольскых Пути Желізницьовой Туристикы. В проґрамі традицийні находят ся переізды памятковыма складами на ріжных трасах, тіж до лемківскых сел. Першый раз трансмітуваны будут нажыво в сіти інтернету.
Паровозы та забытковы ваґоны з деревяныма лавками (зо Скансену Желізницьового Табору в Хабівці) выіхают на торы вчас переіздів в вересни/септембрі і жолтни/октобрі до Крениці, Мушыны, Нового Санча, Ґорлиц, Біча, Тарнова, Тухова і Жабна.
Терміны переіздів
Охочы можут переіхати ся памятковым потягом або обізрити склады вчас постоів на стациях. Першый раз переізды будут трансмітуваны тіж в інтернеті – на сайті Facebook i в сервісі YouTube. Орґанізаторы ґарантуют, што переізды будут орґанізуваны згідні з актуальныма санітарныма принципами. Терміны:
- 26. вересня/септембра (субота) – Новый Санч – Мушына, Мушына – Крениця та Мушына – Жеґєстів
- 27. вересня/септембра (неділя) – Новый Санч – Біч, Біч – Ґорлиці
- 3. жолтня/октобра (субота) – Тарнів – Тухів та Тарнів – Жабно
- 4. жолтня/октобра (неділя) – Тарнів – Тухів та Тарнів – Жабно
- 11. листопада/новембра (середа, свято) – Хабівка – Новый Санч
- 5. грудня/децембра (субота) – Хабівка – Мшана Дольна, Хабівка – Рабка
Любителі желізниці
Орґанізатором переіздів є Новосандецкє Стоваришыня Любителів Желізниці во спілпраци з PKP CARGO. Проєкт фінансово підперло Малопольскє Воєвідство в рамках конкурсу оферт з туристикы пн. Гостинна Малопольща.
Фот. Демко Новак, Біч
Коментарі