Основатель першого на Лемковині хору

16. вересня вродил ся, а 16. марця вмер Теофан Обушкєвич (1841-1924) – священник та громадско-культурний діяч родом зо Ждыні. Основну школу скінчыл в Ждыни, пак в Яслі. Вчыл ся тіж в ґімназиі в Новым Санчы та Пряшові. Богословску освіту отримал в семінариях во Львові, Кракові та Перемышли.

Рукоположений был в 1867 році. Был парохом в парох лемківскых селах: в Матієві, Розтоці, Радоцині, Ганчові. Коли душпастриырювал в тым остатнім, помагал селянам з Устя Руского (тепер Ґорлицкого) выкупувати паньскы лісы, а окрем того основал там перший на Лемковині хор і ансамбль, якій пригрывал на забавах. В 1890 році на просьбу американьскых Лемків поіхал до ЗША нести душпастырску послугу. Основал пару новых грекокатолицкых парафіі і зміцнял тоты уж істніючы.

Брал актывну участ в орґанізациі грекокатолицкой церкви в Америці, постулювал за єпископом для Русинів ЗША, як тіж о основаня церковных братств і світскых орґанізаций для русиньскых еміґрантів. Т. Обушкєвич был спілосновательом Объєднаня Грекокатолицкых Рускых Братств – найвекшой орґанізациі закарпатскых грекокатоликів. В звязку з тым, же орґанізация мала проугорску орієнтацию спілосновал Рускій Народний Союз, котрой членами могли быти вшыткы Русины без огляду на віру. По тому, як тота орґанизация зачала сприяти проукраіньскій орієнтациі, Т. Обукєвич лишат єй і вступує до Товариства Рускых Братств. В роках 1905-1909 был редактором пресового орґану ораґанізациі – ґазеты “Правда”.

Орґанізувал збіркы грошы для Русинів, студиюючых на Львівскым Університеті. Підпорювал діяльніст Руско-Народной Орґанізациі. Утримувал листовий звязок з Лемковином, был добрым знаємым о. Теофіля Качмарчыка з Білцаревы. Слал тіж грошы вязененым в Талергофі Лемкам.

Вмер 16. марця 1924 рока в місті Фраквіль в ЗША.

(фот. Річ Кастер)