ОСРС робить на леґіслатівнім замірі. Підпорує єпіскопа про Русинів

В суботу 16-го януара 2016 р. проходило в Пряшові 17-те засіданя Округлого стола Русинів Словеньска (ОСРС).

В рамках проґраму была прочітана і офіціална позіція Ґрекокатолицькой архієпархії в Пряшові о можливостях зряджіня русиньской єпархії на теріторії Словакії з погляду Кодекса канонів выходных церьквей – канонічного права выходных католицькых церьквей. Як ся у выголошіню архієпіскопства, котре про ОСРС написав Любомір Петрик, пише, із погляду Кодекса канонів выходных церьквей не є можливе у выходных католицькых церьквах вытворіня персоналной єпархії ці екзархату, і вшыткы церьковны єдиніці суть творены лем теріторіялно. Зато не є можливе ани вытворіня такой єпархії, котра бы была лем про Русинів, кідьже Русины на Словакії не жыють на неперерываній теріторії. Із той причіны ОСРС буде підтримовати рішіня вопросу Русинів ґрекокатолицького віроісповіданя способом выменованя єпіскопа помічника в сучасній Пряшівскій архієпархії, котрый бы мав на старости і душпастырьство Русинів.

Мілан Піліп інформовав о конференції ку приготовленій пропозіції народностного закона, на котрій робив ОСРС під веджіньом ґаранта Андрія Ліґы. Конференція проходила в Братіславі і были на ній участны і представителі далшых народностных меншын. По конзултаціях з далшыма меншынами ОСРС запрацує пожадавкы тых меншын до приготовленой пропозіції. Так само є подля фаховців на леґіслатіву найперше потрібне вытворіня леґіслатівного заміру закона, кідьже ОСРС має лем параґрафову верзію закона. Выпрацованьом леґіслатівного заміру, де буде обще пописане то, што вшытко бы мав закон рішыти, ОСРС повірив Владиміра Мінчіча, правника і высокошкольского педаґоґа, котрый вже має скушености із леґіслатівным процесом на Словакії. Мінчіч буде так само кандідовати в доповнюючій вольбі до Выбору про народностны меншыны і етнічны ґрупы на місце заступника члена за русиньску народностну меншыну. Місце заступника зістало вольне по тім, што ся Мілан Піліп став рядным членом выбору по абдікації Мілана Мнягончака. У выборі є рядным членом за Русинів іщі Ян Ліпіньскый і застуником Петро Медвідь.

До кінця януара мають членове ОСРС передкладати свої пропозіції пріоріт про підпору русиньской културы на 2016 р. О тых пріорітах ся буде голосовати „per rollam“ в місяці фебруар. Резултаты голосованя будуть передложены як рекомендація дотачній комісії Уряду влады Словацькой републікы. ОСРС буде рекомендовати дотачній комісії, жебы підпоровала такы фестівалы і події, котры жадають підпору із русиньскых грошей, де є найвекша кількость проґраму присвячена презентованю русиньской културы.

На найблизшім засіданю ОСРС собі русиньцка платформа знова по році буде выберати нову презідію.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА