Оцінили владыку Мілана Хаутура

Жупны депутаты Кошыцького самосправого краю в понедільок 21-го авґуста 2017-го рока на своїм засіданю вырішыли, котры особности і колектівы дістануть Ціну Кошыцького самосправного краю (КСК) за рік 2017.

Міджі оціненыма є і ґрекокатолицькый єпарха Кошыцькой ґрекокатолицькой єпархії владыка Мілан Хаутур. Ціну КСК кошыцькый єпарха здобыв із нагоды його 60-ых народенин і за вызначный вклад при будованю екуменізму в Кошыцькім краї, актівности при роботі з молодежов і соціално слабшыма ґрупами жытелів, як і за рішучій вклад коло зачленіня Кошыцькой єпархії до духовного і сполоченьского жывота краю.

Мілан Хаутур

Владыка Мілан Хаутур народив 4-го септембра 1957-го року в Снині. Дітинство пережыв в малім русиньскім селі Велика Поляна, котре днесь вже не існує. Село было жертвов будованя водного резервоару Старина.

Владыка штудовав на ґімназії в Гуменнім, пак быв в році 1976 приятый на Кірілометодійску богословску факулту в Братіславі. В тім часі ґрекокатолици не могли мати властну семінарію, і так каждый рік державов встановлене мале чісло богословів могло іти штудовати на римокатолицьку факулту в Братіславі. Два рокы перед штудійом в Братіславі тайно вступив ку ґрекокатолицькым редемпторістам своїма першыма обітами. Вічны обіты мав владыка Мілан тайно о шість років пізніше. На священика быв рукоположеный в році 1981. В роках 1982 аж 1984 абсолвовав обоязкову основну воєньску службу і пак зачав выконовати душпастырьску діялность.

В роках 1984 аж 1985 быв на парохії в Меджілабірцях, де ся му подарило забезпечіти будову фары. Про свою актівну роботу з молодежов, штос я не любило комуністічным влластям, быв переложеный до Шмиґовця, села далеко од центру діяня. І на тій парохії, на котрій быв в роках 1985 аж 1989, зробив барз много хосенной роботы в навколишніх дванадцятьох русиньскых селах. Од юлія 1989-го року быв післаный до Порубкы і єдночасно выпомагав у Гуменнім. О рік пінзіше став ся протоіґуменом – віцепровінціалом Конґреґації редемпторістів з резіденційов у Михалівцях.

11-го януара 1992-го року папа римскый Йоан Павел ІІ. выменовав Мілана Хаутура за владыку помічника Пряшівской ґрекокатолицькой єпархії. Рукоположеный на єпіскопа быв руками втогдышнього пряшівского єпархы – владыкы Йоана Гіркы, 29-го фебруара 1992-го року. 21-го фебруара 1997-го року быв тым самым папом римскым выменованый за першого екзарху нововыникнутого Кошыцького ґрекокатолицького екзархату з центром в Кошыцях. О єденадцять років пізніше, в рамках реорґанізації церьковного управліня на теріторії Словакії, быв владыка Мілан Хаутур 30-го януара 2008-го року папом римскым менованый за кошыцького єпарху. В тім самім часі, коли єкзархат быв підвышеный на єпархію, єпархія в Пряшові стала ся архієпархійов і нова єпархія выникла в Братіславі, чім на Словакії выникла метрополітна церьков.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА