Памяти Богдана Ґамбаля. Молитва в першу річницю смерти

2. липця/юлия 2021 р. выпадат перша річниця смерти Богдана Ґамбаля (1965-2020), выдатного лемківского діяча, реактиватора ґорлицкой Руской Бурсы і основателя першого лемківского радия ЛЕМ.фм.

Хочеме молитовно спомнути на нашого камарата, ідеового товариша вельох люди одданых нашій справі, щырого і доброго чловека.

В суботу, 3. липця/юлия 2021 р., о год. 11.30 просиме до участи в молитвах за душу Усопшого, якы будут правлены в місци близкым каждому з нас – в каплици на св. Горі Явір над Высовом. Богослужыня очелит грекокатолицкій священник о. Ярослав Чухта. Служены будут Божеска Літургія, пак Панахіда.

Вічна Памят!

Богдан Ґамбаль

Богдан Ґамбаль вродил ся 26. лютого/фебруара 1965 р. в Польковицях на Нижнім Шлеску, де в 1947 р. насильно выселены были його родиче, якы родом были з Чарной і Одырного на Лемковині. По завершыню основной едукациі, студиювал в Кракові. Пак остал ся як раз гын, одкале мал ближе на рідны карпатскы землі.

Был ініциятором реактивуваня на основі первістного статуту Стоваришыня «Руска Бурса» в Ґорлицях. Был пак долголітнім і вельократным ведучым той орґанізациі. Основал в 2011 р. перше лемківскє радийо ЛЕМ.фм, занимал ся ідейом Лемківского Інституту.

Был вызначным лемківскым політиком і діячом. Мал вельо візийонерскых плянів. Будувал, а радше одраджал, єдніст серед вшыткых Карпатскых Русинів. Окрем облюбленой Лемковины, залюбил ся в Пряшівскій Руси, в єй істориі, культурі і людях.

Вмер по куртій хвороті, 2. липця/юлия 2020 р. в Кракові. Більше з богатой біоґрафіі Богдана Ґамбаля чытайте в нашій архівальній статі.