Папа Франціск поблагословив Русинам ерб і крест

27-го марца 2019-го року архієпіскоп Гайдудорозьской ґрекокатолицькой архієпархії і метрополіта Мадярьска владыка Філіп (Кочіш) вєдно із Віров Ґіріц, представительсков русиньской народностной меншыны в мадярьскім парламенті і Віктором Крамаренком, котрый є председом Вседержавного русиньского самосправованя в Мадярьску брали участь на авдієнції у Папы римского Франціска.

Почас той стрічі із найвысшым представительом Католицькой церькви, котра проходила на Площі св. Петра у Ватікані, Папа Франціск поблагословив Русинам в Мадярьску вырізаваный русиньскый ерб і крест.

Ерб і крест буде на русиньскім домі

Деревяный крест і  ерб, котры поблагословив Франціск, будуть на новім ґрекокатолицькім Русиньскім путницькім домі. Тот ся буде святочно одкрывати в районі Йовжа в Дебрецині в місяці апріль 2019-го року.

Фундаменты того дому были посвячены в юлі 2017-го року і будованя фінанцовала мадярьска держава. Дім бы мав быти центром, котрый не буде служыти лем Русинам в Мадярьску, но мав бы мати і роль при надвязованю контактів і співпраці з Русинами з далшых держав. „Ту будеме годны ся стрічати, бісідовати і коордіновати свої дії в будучности,“ повіла Віра Ґіріц на події заложіня первого каміня Русиньского путницького дому у 2017-ім році.

В Мадярьску ся в остатнім переписі населіня приголосило 3882 людей ку русиньскій народности, з того 1777 ку Ґрекокатолицькій церькви.

О події інформовало і ватіканьске радіо

О делеґації русиньскых ґрекокатоликів, котры пришли на авдієнцію з Папом і дали поблагословити свій ерб і крест інформовало і мадярьске высыланя Radio Vaticana. Із той нагоды было зроблене інтервю з владыком Філіпом, котре ся дістало до высыланя 29-го марца 2019-го року.

Жрідло фотоґрафії: Вседержавне русиньске самосправованя в Мадярьску.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА