Папа Франціск призначів нового кошыцького єпарху

Як інформовав Пресовый центер Кошыцькой єпархії, Папа римскый Франціск прияв дня 24-го юна 2021-го року зречіня ся пастырьского ряджіня Кошыцькой ґрекокатолицькой єпархії передложене владыком Міланом Хаутуром, і єдночасно призначів за кошыцького єпарху владыку Кіріла Василя.

Архієіскоп Кіріл быв дотеперь апостольскый адміністратор єпархії sede plena Кошыцькой єпархії.

„Призначіня єпрхіалного єпіскопа є проявом старостливости Святішого Отця о окремы партікуларны церькви і його намагы забезпечіти Божому народу безпечне веджіня ку спасі,“ пише ся в інформації, котру подала Кошыцька єпархія.

Владыкови Кірілови зіставать особный тітул архієпіскоп. Лем 21-го юна быв Папом рисмскым призначеный за члена Верьховного трібуналу Апостольской сіґнатуры у Ватікані. Апостольскым адміністратором sede plena быв владыка Кіріл од 20-го януара 2020-го року.

Архієпіскоп Кіріл

Новый кошыцькый єпарха Кіріл Василь народив ся 10-го апріля 1965-го року в Кошыцях. Його отець быв ґрекокатолицькым священиком. Богословскы штудії закінчів на Римокатольцкій кірілометодійскій богословскій факулті Універзіты Коменьского в Братіславі у 1987-ім році. В тім часі ґрекокатолицькы богослові штудовали на римокатолицькій факулті, бо властну семінарію ґрекокатолици не могли мати.

По закінчіню штудій быв крижевацькым єпархом Славоміром Мікловшом рукоположеный на священика Пряшівской ґрекокатолицькой єпархії. Єпархія втогды не мала свого єпіскопа, вів єй ордінарій Йоан Гірка, пізнішый єпарха.

В авґусті 1987-го року, з позволіньом ордінарія, еміґровав до Італії і зачав штудіюм на Правницькій факулті Папского восточного інштітуту в Римі. В децембрі 1989-го року здобыв ліценціат канонічного права і зачав штудовати приправный рік ку докторату. В октобрі 1990-го року штудіюм перервав і наступив до новіціату Товариства Ісусового (єзуіты) у Дженові.

По навернутю до Рима у 1992-ім році продовжовав у штудію і в децембрі 1994-го року здобыв докторат канонічного права на Правницькій факулті Папского восточного інштітуту в Римі. У 2002-ім році быв на тій школі выбратый за декана, проректора і в маї 2007-го року быв выменованый за ректора.

Од мая 2009-го року быв секретарьом Конґреґації про восточны церькви. Втогды быв і призначеный за архієпіскопа, єпіскопске рукоположіня прияв в юні од крижевацького єпіскопа Славоміра Мікловша, пряшівского архієпскопа метрополіты Йоана Бабяка і кошыцького єпархы Мілана Хаутура. Є автором многых публікацій і довгы року співпрацує з Radio Vaticana.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА