Папа молив ся перед Клокочівсков Богородіцьов

Од 28-го юна до 2-го юла 2021-го року проходить путь віруючіх Кошыцькой ґрекокатолицькой єпархії в Римі вєдно із чудотворнов Іконов Пресвятой Богородіці з Клокочова.

Тота путь проходить із нагоды 350-ой річніці, одколи Клокочівска Богородіця слызыла. Хоць річніця а з тым і Юбілейный рік припали на минулый рік, путь была з причіны пандемії перенесена. Коло 350 путників з Кошыцькой єпархії веде владыка Кіріл Василь, кошыцькый єпарха. Участный є і владыка Андрій Пацак, емерітный торонтьскый єпарха.

Папа молив ся перед Богородіцьов з Клокочова

29-го юна, на праздник свв. апостолів Петра і Павла, покровителів Рима, на торжественных богослужінях, котры одправляв Папа римскый Франціск у Ватіканьскій базиліці, была выставлена і Ікона Пресвятой Богородіці з Клокочова, котру там принесли віруючі із своїм єпархом.

Ікона была на честнім місці, по лівім боці головного престола, над гробом святого Петра, окрашена білыма ружами.

Святішый отець на початку і кінцю торжественных боголужінь молив ся перед чудотворнов іконов з Клокочова. На кінцю перед іконов зістав почас цілого співу Salva Regina, пак з єпіскопскым жезлом в руці приступив ближе, дотулив ся іконы і перехрестив, інформовав портал Vatican News.

Папа Франціск поздравив путників з Кошыцькой єпархії і на авдієнції 30-го юна. Особно ся поздравив з владыками Кірілом і Андрійом, вірных поздравив поздравом Слава Ісусу Хрісту!

Заставили ся і в крижевацькій катедралі

Почас свого путованя до Рима чудотворна ікона заставила ся в суботу 26-го юна і в Ґрекокатолицькім катедралнім соборі Пресвятой Тройці в Крижеваці. Владыків Кіріла і Андрія там привітав крежевацькый єпарха Мілан Стіпіч вєдно із своїма віруючіма. Перед іконов ся в суботу помолили молебен.

Навщіва іконы продовжовала в неділю архієрейсков літурґійов, котру служыв архієпіскоп Кіріл, проповідь мав влалдыка Мілан. На кінцю ся перед Клокочівсков Богородіцьом помолили Акафіст.

По закінчіню выпроводили жытелі міста Ікону Пресвятой Богородіці з Клокочова аж на граніцю міста.

Покровителька Земпліна

Тот рік на свято Благовіщенія Пресвятой Богородіці быв у вшыткых храмах Ґрекокатолицькой церькви на Словакії прочітаный декрет Конґреґації про восточны церькви, котрым ся выголосила Клокочівска Богородіця за Покровительку Земліна.

До літурґічного календаря ґрекокатоликів на Словакії дістав ся новый праздник з назвов Память чудотворной Клокочівской іконы Пресвятой Богородіці, Покровителькы Земпліна.

Підпорны писма ку выголошіню Клокочівской Богородіці за Покровительку Земпліна дали і Монс. Бернард Бобер, кошыцькый римокатолицькый архієпіскоп-метрополіта, а владыка Ґеорґій Страньскый, православный архієпіскоп михалівско-кошыцькый.

Жрідло фотоґрафії: Vatican News.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА