Голосник

Папа просит вшыткых до спільной молитвы Отче наш

Папа римскій Франциск запросил вшыткых християн до спільной молитвы о закінчыня пандеміі коронавіруса. З таком ініциятивом вышол вчас традицийной недільной молитвы Ангел Господній, котра уж третю неділю одбыла ся без участи вірных.

По закінчыню молитвы Франциск апелювал до християн ріжных конфесий, жебы спільно о єдным часі одгварити молитву Отче наш. Папа запропонувал полудне 25. марця 2020 р. В тот ден Костел за григорияньскым календарьом припоминат праздник Благовіщыня.

«На пандемію віруса одповіджме загальном молитвом, спілчутьом і чутливістю. Останме зъєднаны. Зробме, жебы особы найвеце самітны і досвідчены почули нашу близкіст», апелювал папа римскій. Бесідувал і, што вчас пробы, коли ціле людство стрітило ся з пандемійом коронавіруса, люде повинны одповісти молитвом. «Запрашам вшыткы главы церкви, вшыткых християньскых громад, християн вшыткых конфесий звернути ся до Всевышнього, молити ся о єдным часі. Запрашам одгварити молитву Отче наш 25. марця, в полудне», продолжал.

Голова Католицкой Церкви оголосил, што і в пятницю 27. марця одгварит особисту молитву з балькону собору святого Петра. Франциск на пандемію віруса хоче одповісти «пандемійом молитвы і спілчутя».

фот. Vatican Media

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі