Папа выменовав апостольского адміністратора кошыцькой єпархії

Папа римскый Франціск выменовав в понедільок 20-го януара 2020-го року за апостольского адміністратора sede plena Кошыцькой ґрекокатолицькой єпархії владыку Кіріла Василя, тітуларьного архієпіскопа Птолемаіды в Лібії, дотеперь архієпіскопа – секретаря Конґреґації про восточны церькви.

Архієпіскоп Кіріл так дочасно поведе єпархію, котру од выникнутя у формі екзархату у 1997-ім році, пак од 2008-го року як єпарха веде владыка Мілан Хаутур.

Архієпіскоп Кіріл Василь

Новый апостольскый адміністратор sede plena Кіріл Василь народив ся 10-го апріля 1965-го року в Кошыцях. Його отець быв ґрекокатолицькым священиком. Богословскы штудії закінчів Кіріл Василь на Римокатольцкій кірілометодійскій богословскій факулті Універзіты Коменьского в Братіславі у 1987-ім році. В тім часі ґрекокатолицькы богослові штудовали на римокатолицькій факулті, бо властну семінарію ґрекокатолици не могли мати.

По закінчіню штудій быв крижевацькым єпархом Славоміром Мікловшом рукоположеный на священика Пряшівской ґрекокатолицькой єпархії. Єпархія втогды не мала свого єпіскопа, вів єй ордінарій Йоан Гірка, пізнішый єпарха.

В авґусті 1987-го року, з позволіньом ордінарія, еміґровав до Італії і зачав штудіюм на Правницькій факулті Папского восточного інштітуту в Римі. В децембрі 1989-го року здобыв ліценціат канонічного права і зачав штудовати приправный рік ку докторату. В октобрі 1990-го року штудіюм перервав і наступив до новіціату Товариства Ісусового (єзуіты) у Дженові.

По навернутю до Рима у 1992-ім році продовжовав у штудію і в децембрі 1994-го року здобыв докторат канонічного права на Правницькій факулті Папского восточного інштітуту в Римі. У 2002-ім році быв на тій школі выбратый за декана, проректора і в маї 2007-го року быв выменованый за ректора.

Од мая 2009-го року є секретарьом Конґреґації про восточны церькви. Втогды быв і выменованый за архієпіскопа а єпіскопске рукоположіня прияв в юні од крижевацького єпіскопа Славоміра Мікловша і пряшівского архієпскопа і метрополіты Йоана Бабяка і кошыцького єпархы Мілана Хаутура. Є автором многых публікацій і довгы року співпрацує з Radio Vaticana.

Адміністратор sede plena

Апостольскый адміністратор sede plena є выменованый за справцю єпархії в часі, коли єпархіальный єпіскоп не годен выконовати справу єпархії з важной, але з характеру діла дочасной причіны, наприклад при хвороті.

Офіціалны інформації не пишуть о тім, з якых причін не годен владыка Мілан выконовати свої права і обовязкы, но зіставать кошыцькым єпархом.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА