Патріархови Юссефови (Абсі) уділили золоту медайлу Пряшівской універзіты

Як інформовав Інформачный центер Пряшівского архієпіскоства, на запрошіня пряшівского ґрекокатолицького архієпіскопа і метрополіты Словакії Йоана (Бабяка), зачатком авґуста 2019-го року завітав на Словакію на сімдньову навщіву Його Блаженость Юссеф (Абсі), мелхітьскый ґрекокатолицькый патріарха Антіохії і цілого Востока, Єрусалима і Александрії.

В пятніцю 2-го авґуста в субороводі з метрополітом срітив ся патріарха в Братіславі із представителями Словацькой републікы, пак навщівив Апостольску нунціатуру на Словакії.

Медайла од Пряшівской універзіты

Через вікенд быв патріарха участный на архієпархіалнім одпусті, котрый проходив на Горі Звір в русиньскім селі Літманова. Вєдно із метрополітом одслужыв вечерню літурґію в суботу, в неділю на торжественній одпустовій архієрейскій літурґії мав проповідь.

В понедільок 5-го авґуста ся Його Блаженость стрітив у Пряшові з представителями містной і реґіоналной самосправы. В тот самый день му в просторах Ґрекокатолицькой теолоґічной факулты Пряшівской універзіты ректор Петер Коня уділив золоту медайло Пряшівской універзіты в Пряшові. Тото оцініня было патріархови уділене на пропозіцію декана Ґрекокатолицькой теолоґічной факулты Петра Штурака за проглубліня меджінародной акцептації і меджінародной співпраці меджі Конґреґаційов про восточны церькви і Пряшівской унівезітов.

Друга найвекша католицька церьков візантійской традіції

Його Блаженость Юссеф быв выбратый за патріарху 21-го юна 2017-го року, місяць по тім як Папа римскый Франціск прияв резіґнацію Ґриґорія ІІІ. (Лагама), котрый быв на Словакії веце раз. Про Патріарху Юссефа то была перша навщіва нашой країны.

Мелхітьска ґрекокатолицька церьков є частьов Католицькой церькви і належыть меджі 23 восточных церьквей, подобно як Ґрекокатолицька метрополітна церьков sui iuris (свого права) на Словакії. За кількостьов вірників, котрых має приблизно 1,6 міліона, є четвертвов найвекшов восточнов церьквов і спомеджі церьквей, котры походять із візантійской традіції, є по Україньскій ґрекокатолицькій церькви другов найвекшов. Україньска ґрекокатолицька церьков має статус лем верьхнього архієпіскопства, не патріархату.

Патріарха урядує в Дамашку, в Сірії, де проходить остатні рокы гражданьска война. Много храмів было зниченых, його вірны зажывають тяжкы часы. Церьков выникла одділіньом ся од Ґреческого православного патріархату в Антіохії в році 1729, коли быв Кіріл VI. признаный Папом римскым за католицького патріарху Антіохії.

Жрідло фотоґрафій: grkatpo.sk

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА