Перегляд колядничых ґруп

Як што рока, в тым особливым святочным часі Стоваришыня Руска Бурса в Ґорлицях красні просит на шорову імпрезу – Перегляд колядничых ґруп, котра одбуде ся 16. січня/януара 2016 рока о 14.00 год. На сцені будут ся презентувати діти і молодіж зо шкіл ґорлицкого повіту, в якых ведена єст  наука лемківского языка, хоц то не принцип, понеже влони, окрем шкільных ґруп, зъявили ся ґрупы, зрыхтуваны родичами, або священниками. До 10. січня/януара каждий індивідуальні може зголосити свою ґрупу, высыляючы інформацию з чыслом участників на адрес е-майль: monika.tylawska@gmail.com.

По выступах ґруп одбуде ся концерт коляд в выконаню бурсяного ансамблю «Терочка» і ансамблю «Роса» з Ганчовы.

Імпреза має на ціли защыпити в молодых людях святочны традициі колядуваня, але тіж просто лучыти лемківску молодіж, жебы при спільным колядуваню могли ся ліпше познати і спільні разом побыти.

Красні просиме на спільне колядуваня. Молоды артисты ждут публикы і оплесків, бо прирыхтувати ся до той подіі то вельо тыжнів тяжкой роботы, зато нагородме іх працу нашым заінтересуваньом.