Перша дама лемківской літературы і еманципациі жен

Днес річниця уродин Клавдиі Алексович – писменниці родом з Красной, (тото село выдало і выдатного лемківского писателя Івана Русенка). Вродила ся Клавдия Алексович 20. лютого 1830 рока в священничій родині. Отец был грекокатолицкым священником в Красній, мама была дівком о. Андрия Трохановского, якій был парохом в Грабі. Скоро осиротіла і нашла ся під опіком уйка – перемышльского єпископа Томы Поляньского, якій задбал о єй едукацию і выхованя.

Клавдия Алексович выдала перший в Галичыні рускій альманах для жен “Перемышлянка”, была основательком Общества Русских Дам – першой того рода орґанізациі для галицкых Русинок. Окрем того, вела пенсийонат для рускых дівчат. Была почесном членкыньом Товариства ім. М. Качковского і Літературного Товариства Муза. Вмерла 15. жолтня 1916 рока во Львові де остала похована в гробі галицко-рускых писателів і журналістів.

Окрем шырокой соспільной діяльности К. Алексович вславила ся як вызначна писменниця. Писала в язычію – товдышнім літерацкым языку Русинів. Писала і для дорослых, і для діти – вершы, оповіданя, драмы, байкы. Писала творы патріотычны, обычайовы, дидактычны, освітовы – свойом свідомом творчістю хотіля заєдно вчыти, змушати до рефлексиі, але і бавити. Серед барже знаных творів находат ся:  драмы Запоморочена, Берко, для діти Двѣ сестрички, Подорожь Лядзѣ до Дѣдуся, Время летитъ та інчы: Народное повѣрье на Великой Руси, Заклятый медвѣдь ци Пѣсня Ольдины.

Драму Запоморочена (в злемківщеній Петром Мурянком версиі як Отуманена) выставлял в 2001 р. Театр Терка, діючий при Стоваришыню Руска Бурса в Ґорлицях. Запис той драмы, завдякы п. Владекови Максимовичови, можете обізрити пониже.

http://youtu.be/q8C0xBpPdpQ