Голосник

Першы матуры за нами. Матура з лемківского о нецілы два тыжні

В понедільок, 8. червця/юнія, зачали ся матуральны еґзаміны, котры з причыны пандеміі были перенесены такой о місяц. В першым тыжни матур абітуриєнты писали еґзаміны м.ін. з польского языка, математикы і чужых языків.

В середині матурального маратону заплянувана єст матура з лемківского языка. Подля інформаций буде єй здавала лем єдна особа.

Безпека

Пандемія коронавірса попутала пляны і в едукациі. Традицийно матуры мали зачати ся початком мая. Міністерство Нацийональной Едукациі протягом послідніх тыжнів інформувало про ріжны можливы сценариі проведіня тогорічных матур. Остаточно за початок еґзамінів дозрілости выбрано тот понедільок, 8. червця/юнія.

Дотля матуристы встигли написати еґзаміны з тзв. основных предметів. В будучым тыжни будут здаваны іспыты на розшыреным рівни. Товды буде мож писати матуру м.ін. з математикы, ґеоґрафіі ци знаня про соспільство.

Як подают завідуючы поєдныма середніма школами і уряд влады, вшыткы еґзаміны одбывают ся при захованю норм безпекы. Каждый з абітуриєнтів має входити на салю з закрытыма устами і носом, мусит тіж дезинфекувати рукы. Матуристы, подля інструкций, мают сідити в осібных лавках, тримаючы што найменьше 1,5-метровий дистанс. В тым році зрезиґнувано з бесідуваной формы еґзамінуваня.

Tогорічны матуры быти може зачали ся немалым скандальом. Центральна Еґзамінацийна Комісия підозріват, же част матурантів могла знати єдну з тем до опрацуваня на основным рівни матуры з польского языка. Подля інформаций, котры передал шеф ЦЕК, хвилю пред початком першого тогорічного еґзаміну, знимка з фраґментом матурального аркуша явила ся на єдній з фейсбуковых ґруп, до котрой доступ мали тогорічны абітуриєнты. Комісия потвердила, што в тых самым годинах на обшыри підляшского воєдівства збільшыло ся чысло вписуваня в інтернетову глядачку темы, котра гейбы вытекла. Кєд буде тото потверджене, част зо здаючых буде мусіла наново написати матуру з польского языка.

Єден лемківскій

Матура з лемківского языка, по змінах в тогорічным гармоноґрамі, была заплянувана на середину еґзамінацийного маратону. Дотля было так, што одбывала ся під його конец. Матуры з інчых языків нацийональных меншын сут заплянуваны подля старого порядку – на конец, тє. тым разом на 29. червця/юнія.

Лемківскій буде здаваный 22. червця/юнія. Початок о 9.00 год. Еґзамін формально заплянувано на двох рівнях – основным і розшыреным.

Подля доступных інформаций, тогорічну матуру з лемківского буде писала лем єдна особа. Для порівнаня украіньскій задеклярувало здавали 34 учеників, кашебскій язык 33, литовскій 20, а білорускій 15.

На матурі з лемківского треба написати долшый текст (выпрацуваня) на єдну з двох поставленых тем. Дотля было так, што єдна з них односила ся до прозы, а друга была присвячена – найчастійше – аналізі верша або порівнаню двох творів.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі