Петиция ґмін: Команча, Яслиска, Крампна, Дукля

Ґміны Яслиска, Команча, Крампна і Дукля вєдно з самоурядовыма властями та жытелями внесли петицию до Реґіональной Дирекциі Охороны Середовиска в Ряшові в справі рішыня Пляну Охороных Задач для теренів, котры обнимают іх ґміны.

Мешканці м.ін. ґмін Команча, Яслиска, Крампна, Дукля не квестийонуют потребы охороны селиск птахів, але не достерігают місця в проєкті для себе. Іде о Плян Охоронных Задач зрыхтуваный з рекомендациі Реґіональной Дирекциі Охороны Середовиска в Ряшові, котрого введіня несе зо собом поважны ограничыня в можливости забудовы на обшырях зінвентаризуваных природничых селиск.

Ґміны і повіт сут проти

«Введіня проєкту (…) в теперішній формі істотні нарушат соспільный інтерес, в ниякій ступени не бере до увагы потреб люди, котры на обшыри Низкого Бескіду все жыли і будут жыти в симбіозі з природом, без шкід для ней» – чытаме в петициі.

Новы переписы обняти бы мали аж 21 ґмін, іх жытелі не хотят, жебы обняты были нима терены, якы безпосередньо прилігают до воєвідскых, повітовых і ґмінных доріг, з вылучыньом тых забудуваных або в будові. Мешканці скаржат ся, што подля новых переписів не будут мочы будувати на своіх ділянках, ани хоснувати свого поля під управу. Згідні з плянуваным проєктом на обшырях обнятых Пляном в примірі дакой будовы буде обовязок зробліня коштовного рапорту влияня на середовиско, котрого реализация тырват часом і роками.

Рада Саноцкого Повіту на засіданю 22. мая тр. рішыла схваліньом поперти петицию. Скорше справом занимала ся Комісия Транспорту, Господаркы Нерухомостями, Рільництва і Охороны Середовиска Рады Саноцкого Повіту.

Подля самоурядовців новый проєкт охороны середовиска нарушат соспільный інтерес, ограничат можніст розвитку місцевых люди.

Проти є і соспільніст

Стоваришыня Підпераня Локальных Ініциятив Команчы Вільк переслало до Реґіональной Дирекциі Охороны Середовиска в Ряшові внесок о затриманя поступуваня і порішыня справы з соспільністю Ґміны Команча і орґанізациями та підметами, што діют на єй обшыри. В писмі орґанізация замітує РДОС м.ін., што опрацуваня не робили на актуальных тереновых даных – мапах і знимках, што веце – што хоснуваны были не лем старым але і неправильны даны, якы не брали до увагы актуального стану заґаздуваня теренів обнятых проєктом. Не увзгляднили тіж потреб місцевых мешканців. «Не увгляднили тіж веденых актуальні адміністрацийных поступувань в обшыри рішыня обставин забудовы та уж выданых будовляных рішынь» – чытаме во внеску.

Соспільникы постулюют о повторіня природничого моніторінґу, при участи мешканців і локальных власти.