Підкарпатя на знимках Рудолфа Гулкы онлайн

Як інфомровала 30-го марца 2022-го року Славяньска бібліотека в Празі, інштітуація сприступнила вшыткы выбраны фотоґрафії і фотоґрафічны колекції Рудолфа Гулкы, котры зробив на Підкарпатьскій Руси.

Знимкы суть із першой половины 1920-ых років, коли Гулка в найвыходнішій части втогдышньой Чехословакії працовав. Славяньска бібліотека сприступнила цілково 593 фотоґрафій і суть на порталі, котрый справує Народный музей в Празі за тым мотузком.

Підкарпатьска Русь Рудолфа Гулкы

Рудолф Гулка (рр. 1887 – 1961) быв любительом фотоґрафії, іншак професійов урядник а пізніше і тлумач літературы. Підкарпатя фотив в першій половині 20-ых років ХХ. столітя, коли там робив урядника.

Його фаребны, дофарбльованы і чорнобілы фотоґрафії вказуюзь штоденне жытя, роботу селянів і жытелів міст, їх традіції, архітектуру, промысловы будовы, природны мотівы ці ремеселны выробкы. Гулка фотив так русиньскых жытелів Підкарпатьской Руси, котры творили майорітне населіня, як і далшых жытелів – Жыдів, Ромів, Мадярів, якы вєдно з Русинами жыли на тій теріторії.

На фотоґрафіях мож видіти складны соціалны условії Підкарпатя, котре было за Астро-Угорьской імперії єдным із найменше розвитых реґіонів, як і то, же Чехословакія такой по вытворіню републікы зачала актівно інвестовати до реґіону і зліпшовати условії про жывот підкарпатьскых жытелів. Векшына з того, што творило унікатну атмофсферу русиньского Підкарпатя, счезла по анексії теріторії Совітьскім союзом.

Фотоґрафії Рудолфа Гулкы были выданы і книжно у 2014-ім році (друге выданя р. 2016). Книжку приготовили Гана Оплештілова і Лукаш Бабка. Двоязычня чесько-анґліцька публікація вышла під назвов Zmizelý svět Podkarpatské Rusi ve fotografiích Rudolfa Hůlky (1887-1961) / The Lost World of Subcarpathian Rus’ in the Photographs od Rudolf Hůlka (1887-1961) (Счезлый світ Підкарпатьской Руси на фотоґрафіях Рудолфа Гулкы). Выдала єй Народна бібліотека Чеськой републікы – Славяньска бібліотека.

Славяньска бібліотека

Славяньска бібліотека є публічно приступна шпеціалізована наукова бібліотека про область славістікы, належыть меджі найвекшы і найвызначнішы славістічны бібліотекы в Европі.

Была основана у 1924-ім році, одвтогды сістематічно доповнює, обраблять, тырвало всокочує і сприступнює фонд світовой славістічной літературы, головно історічной, філолоґічной і політолоґічной, а так само выбрану оріґіналну творчость славяньскых народів.

Жрідло фотоґрафії: Národní knihovna České republiky – Slovanská knihovna.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА