По кашебскій етнофілолоґіі час на лемківску?

Успішні скінчыла ся борба о кашебску етнофілолоґію. Нашли ся грошы на отворіня першого в істориі кашебского напряму на выжшых студиях, котрий буде отворений на Ґданьскым Університеті.

Проблемом было мінімальне чысло студентів, потрібне при отвераню нового напряму. Жебы даякій учельни ся тото оплачало, мусти быти 25 охочых студентів, але в припадку меншын, такє чысло є практычні неможливе до осягніня, зато борба была о його зменьшыня. Проблем остал розвязаний завдякы порозумліню університетскых власти з Міністерством Наукы і Выжшого Шкільниства, якє придаст тому специфічному напрямови нове джерело фінансуваня.

Успіх ґданьской учельні, то можливіст для інчых університетів, напр. для краківского, на котрым од років ведена є лемківска філолоґія. Краківскій Університет буде міх старати ся о ґрант на лемківску етнофілолоґію. То шанса для меншын, жебы серед осіб діючых на річ даной суспільности были кфаліфікуваны аніматоры культуры, журналісты, учытелі ітд.