По майже трьох роках має Словакія уповномоченого про меншыны

Словацька влада днесь, 13-го апріля 2016-го року, выменовала свого нового уповномоченого про народностны меншыны і етнічны ґрупы. Од четверьга, 14-го апріля є у тій функції Ласло Буковскі, котрый на уряді уповномоченого робив і в часі, кідь функцію уповномоченого мав Ласло Надь із партії Most-Híd. Втогды ся Буковскі старав о секцію народностной політікы. Інформовала і тім словацька державна пресова аґентура TASR.

Функція уповномоченого про меншыны была необсаджена майже три рокы, од юна 2013-го року, коли із функції одышов як раз Ласло Надь. Причінов было, же у парламенті не перешла новелізація закона о хоснованю языків народностных меншын, котру хотіла перетиснути партія Most-Híd. Од 1-го юла была повірена веджіньом уряду уповномоченого Марія Єдлічкова, котру номіновала втогды єдина владна партія Smer – SD Роберта Фіца.

Буковскі подля TASR бере за єден із головных цілів у своїй функції схваліня нового закона о фонді на підпору културы народностных меншын. Обіцять собі од того стабілізацію і одполітізованя підпоры народностной културы на Словакії.

„За єднако важне беру і рештартованя вшыткых актівностей уряду, котры выпливають із його штатуту і за остнані рокы браковали,“ повів новый уповномоченый про TASR.

Ласло Буковскі в минулости робив і як директор секції Інштітуту памяти народа (Ústav pamäti národa), котрый ся занимать тоталітныма режімами. Выбудовав і вів Архів беспечностных зложок (Archiv bespečnostních složek) в Чеській републіці. Є членом дозорной рады Інштітуту памяти народа і в попереднім періодi діяв як омбудсман партії Most-Híd.

Фотоґрафія: ujszo.com

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА