Початок посту перед праздником свв. Петра і Павла

Днес, подля юлияньского календаря, зачал ся піст перед праздником свв. Петра і Павла, котрий медже Русинами знаний єст як Петрівка. Сес пiст тырват до 12. липця (за григоряньскым календарьом).

Петрівка все зачынат ся в понедільок, вісем дни по Пятдесятниці. Єй долгіст, з причыны рухомого початку, ся змінят, але все кінчыт ся она праздником свв. Петра і Павла. На Лемковині час Петрового Посту был сурово перестеріганий. Так єст і днес. Петрів Піст хоснуют і православна, і грекокатолицка Церкви, до котрых приналежніст в більшости декляруют Русины.

На праздник свв. Петра і Павла в вельох парафіях Карпатской Руси мают місце стародавны кєрмешы.