Подорожнича стріча в Ґорлицях з гімалаістом, якій досяг вершыны найвысшой горы світа, Монт Евересту

Любителі гір і екстремальных вандрівок будут мати неодолга можливіст взяти участ в інтересуючій подіі з Пьотром Сливіньскым – подорожником і гімалаістом, котрый в найблизшый четвер, 21. лютого/фебруара 2019 р., о год. 17.30 в Павілоні Істориі Міста на Рынку в Ґорлицях оповіст о своій подорожы на найвысшый верх світа – Монт Еверест. Сливіньскій досяг го 19. мая 2018 р., жебы упамятнити 100. річницю одзысканя Польщом незалежности. Товаришыла му фана Ґорлиц і прото специяльні приіхат він до нас.

Пьотр Сливіньскій то краківскій подорожник, якій досяг 8 верхів Короны Землі. В 2006 р. першый раз переіхал довкола землю і робит то реґулярно раз до рока. Зорґанізувал він уж 12 такых подорожы і в кажду выберат ся інчом дорогом, одвиджаючы новы місця, хоснуючы ріжны середкы транспорту, примірно 53-річный трактор польской продукциі. Каждого рока Пьотр Сливіньскій входит і на новый верх Короны Землі. Скінчыл він студиі на Краківскым Політехнічным Університеті з будівництва. Наштоден єст выкладовцьом, веде свою фірму, його пасийом сут шахы, а в свобідным часі працує іщы як провідник екскурсий в ріжны закутины світа. Більше о ним мож чытати на його сайті: www.p82.pl.

В експедициі на Монт Еверест в 2018 р. взяли участ Яцек Яснєвскій, Пьотр Сливіньскій та Пьотр Яснєвскій. Я. Яснєвскій і П. Сливіньскій ходят разом по горах світа уж 9 років, а то вшытко в рамках іх спільного проєкту пн. «Jack&Peter 7 Summits Expedition».

Траса експедициі на Монт Еверест проходила Пілнічно-Східньом Ґраньом през Тибет. Я. Яснєвскій, доходячы на высоту 6800 м н.р.м., мусіл аж вернути з причыны інфекциі травной системы, котра довела го до втраты свідомости. До повороту был тіж примушеный П. Яснєвскій, котрый на высоті 8600 м н.р.м. достал сніжной сліпоты. Зачал видіти аж по 2 днях. Лем П. Сливіньскій, як єдиный, успішно досяг вершыны Монт Евересту, а тото зышло ся як раз з його 36. річницьом вроджыня. Але і Сливіньскій мал проблемы, сходячы з горы. Окрем того, же пережыл тзв. «бівак смерти», значыт сам провюл ніч на екстремальным морозі, без шатра і спального мішка, то досвідчыл гіпоксеміі і едеміі мозку.

Пьотр Сливіньскій зо свойой подорожы довкола світа уж вернул минулого рока. О шаленых пригодах, трудных моментах і значыню доброго прирыхтуваня оповіст в найблизшый четвер, 21. лютого/фебруара 2019 р., о год. 17.30 протягом стрічы в Павілоні Істориі Міста на Рынку в Ґорлицях.