Голосник

Нич одбуде ся повселюдный спис, найперше скінчыт ся рільный

Нич Польща і інчы европейскы державы проведут посвелюдне списуваня своіх громадян, де серед ріжных звідань буде мож задеклярувати свою нацийональніст, на обшыри Польской Республикы тырват Рільный Спис.

Головный Статистичный Уряд (ГСУ) в тот спосіб выполнят свій обовязок, жебы каждый польскій рільник был підданый рахуваню. Списуваня ґазвід потырват до 30. листопада/новемвра 2020 р.

Статистикы

Кажде повселюдне списуваня, в тым рільниче, має за головну ціль зробити статистику даной ґрупы. Подля інформаций заміщеных на сайті тогорічного Рільного Спису, чысла зобраны вчас списуваня будут потрібны для аналіз змін, якы прошли в обшыри рільництва протягом 2010 – 2020 рр. Уряд влады хоче так само зобрати основны інформациі про державну, реґіональну і локальну рільну політику на селах.

Рекомендацийом єст, жебы ґаздове записували ся через інтернет. В тій ціли ГСУ до каждого рільника выслал інформацию з можністю самосписуваня. Особы, котры не мают такой можливоси, можут схоснувати поміч поєдных ґмін. Примірово в Выділі Середовиска і Сельскых Обшыри Уряду Ґміны Польковиці зрыхтували компутерове становиско до проведіня самоспису.

Рільный Спис єст обовязковый. Списати мож ся на три способы: через інтернетовый самоспис за посередництвом аплікациі з формулярьом, яка доступна єст на сайті ГСУ, вчас телефонічной бесіды, або – од 1. жолтня/октобра 2020 р. – вчас безпосередньой стрічы з тереновым списувачом.

Прелудия

Мож речы, што тырваючый як раз тепер Рільный Спис єст вступом до більшого – Повселюдного Спису Жытелів, якій заплянуваный єст в Польщы на першу половину 2021 р.

О кілько рільниче списуваня направлене єст лем на ґазвід, котры занимают ся найстійше роботом в поли, або продукцийом молока і хованьом звірины, о тілько Повселюдный Спис буде обовязковый для каждого громадянина Польщы.

Єдном з основных части про особы, якы сут польскыма громадянинами, але мают окрему нацийональніст, буде част тыкаюча звідань про нацийональне (етнічне) привязаня і про материньшкій язык. Хоц ґу початкови будучого спису є іщы кус часу, уж тепер заохочаме вшыткы особы, якы сут частю лемківского народу, жебы задеклярували на повселюдным списуваню лемківску нацийональніст і як рідный материньскій язык – лемківскій.

Шеруй.

О авторі

Севериян Косовскiй

Народженый на чужыні. Матуриста з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Головный редактор Лемківского Річника. Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментарі