Полониньска турістічна траса ближе ку реалізації

Сполочны наміры з Пряшівскым самосправным крайом при розвитку турістічного руху декларовало в януарі 2020-го року 18 партіціпуючіх субєктів, представителів містных заінтересованых ґруп і самосправ.

Было то при нагоді підпису меморандума о взаємній співпраці, котрым сіґнатарі з окресу Снина выразили інтерес взаємно партіціповати при досягованю сполочных цілів, підпорі економічного і соціалного розвитку окресу Снина, і головно области Народного парку Полонины.

Підписом ся декларовала приготовленость на реалізацію думкы вытовріня такзваной Poloniny trail – Полониньской турістічной трасы, котра бы мала стімуловати розвиток турістічного руху в тім русиньскім реґіоні. Траса бы мала зліпшыти мобіліту і доступность сел.

Ближе ку реалізації

Выпрацованя комплексной проєктовой документації на добудованя біціґльовой інфраштруктуры Poloniny trail є предметом заказкы Пряшівского самосправного краю у публічнім конкурзі, котра была публікована у вістнику публічного обстараваня. Інформовала о тім аґентура SITA.

Іде о выбудованя рекреачного округу в окресі Снина і сума заказкы є понад 484 тісяч евр. Траса бы подля вістника мала быти збудована до 20-ох місяців.

В рамках проєктовой документації рахує ся з выбудованьом драгы Старина в бывшім селі Руське, яка має мати 16 кілометрів, так само з выбуродваньом трасы, котра бы мала мати 24 кілометрів в штирьох частях: Рунина – Руськый Потік, Руськый Потік – Уліч-Криве, Кална Розтока – Стащіньска Розтока і Стащіньска Розтока – Стащін.

В далшій етапі має проєктова документація раховати з елелментами дрібной турістічной інфраштруктуры як іншталації ціклотурістічного значіня на цілім окрузі в довжці приблизно 100 кілометрів, включно напоїнь на місто Снина і Руське Сідло на державній граніці з Польщов. Выбудовати бы ся мала і обсерваторія жывой природы, тоалеты про навщівників і пункты про одпочінок.

Полонины в єднім окрузі

Полониньска турістічна траса основать ся на зреконштруованю і выбудованю інфраштруктуры про зліпшіня доступности меджі селами і піднятню якости турістічной і біціґльовой інфраштруктуры.

Poloniny trail буде трасов, котра уможнить навщівникам перейти цілый Народный парк Полонины в єднім окрузі без перерваня. Не мала бы быти фізічно тяжка і буде єй годна хосновати шырока верейность. Траса до великой міры выужывать існуючі лісны або іншы комунікації.

Пропонованы части рекреачной трасы ведуть головно лісным тереном і через пасвиска, творять новый корідор, в котрім не буде мож хосновати автомобілы ці мотоціклы. Проєкт є частьов акчного плану ініціатівы Европской комісії з підпоров Світовой банкы Catching-up Regions II. Меджінародны експерты окрес Снина і область Народного парку Полонины зарадили меджі пілотны реґіоны про наштартованя розвитку і піднятя выконности.

Сіґнатарями меморандума, в рамках котрого ся приготовлює і Poloniny trail, суть Пряшівскый самосправный край, Лісогосподарьскый маєток Уліч, Державна охорона природы Словацькой републікы, Місто Снина, Лісоохранарьске здружіня VLK, Областна орґанізація турістічного руху Вышній Земплін і Вышній Шаріш і села Березовець, Кална Розтока, Кленова, Колбасів, Прислоп, Рунина, Руська Волова, Руськый Потік, Стащін, Стащіньска Розтока, Тополя, Уліч і Уліч-Криве.

Жрідло фотоґрафії: nppoloniny.sopsr.sk

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА