Полонины суть дестіначнов значков. Презентують русиньску културу

Нову дестіначну значку Полонины представили в пятніцю 14-го юна 2019-го року на стрічі присвяченій турістічному руху в просторах Сниньского каштеля. Як згодли ся присутны представителі реґіоналных орґанізацій турістічного сектора, є надійов ку його наштартованю. Інформовала о тім аґентура TASR.

З думков вытворити дестіначну значку пришла в минулім році Фундація Aevis, котра в реґіоні під Вігорлатом видить величезный турістічный потенціал.

Значка продавать

„Значку сьме взяли з маркетінґового боку. Кажда дестінація ся добрі продавать, коли має добру значку,“ пояснила про аґентуру представителька фундації Зузана Бурдова. Робили на ній од осени минулого року вєдно із локалныма додавателями служеб уквартельованя і стравованя, бізнісменами, ремеселниками і потенціоналныма проводниками містнов природов.

„Містны люди выґенеровали то, што бы хотіли запропоновати турістам. Кедь ся повість – Полонины, жебы то обсяговало унікатну природу, котру маєме, унікатне ночне небо, богату природу, карпатьскы деревяны храмы, тіпічну русиньску културу, русиньску кухню. Тото вшытко знаме дати під єдну стріху в рамках дестіначной значкы Полонины,“ інформовала Бурдова.

Ґаландова очекує воведжіня до практікы

Од новой дестіначной значкы Полонины з підтітуом Невіроятно досправдовы очекує розвиток співпраці окремых секторів турістічного руху на северовыході Словакії нелем Областна орґанізації турістічного руху Вышній Земплін і Вышній Шаріш, но і місто Снина, котре орґанізовало ровочу стрічу.

„Тота подія є повязана із крещіньом дестіначной значкы Полонины. Очекую, же ся і реално воведе до практікы. Было бы мі жаль, кебы ся так не стало. Кедь собі робиме анкеты, выгравають Полонины. Но Полонины – то не лем лукы над вышньов граніцьов ліса, але люди їх спринимають як комплекс – і деревяны церькви, і войновы цінтері, значіть Полонины як реґіон. Мы сьме на зачатку, піоніры. Сьме центер служеб, котрый знать додавати службы розмаїтого характеру і Снина, як єдине окресне місто в тім реґіоні, буде, природно, в штруктурах основов той дестінації,“ повіла на стрічі пріматорка Снины Даніела Ґаландова.

На пятніцьовій робочій стрічі, котрой завершіньом была презентація новой дестіначной значкы, презентовали в 15-минутовых блоках свою діялность і планы на тогорічну турістічну сезону многы публічны і мімовладны орґанізації, котры суть повязаны з турізмом в реґіоні.

Крестныма родічами новой дестіначной значкы Полонины стали пріматорка Снины Даніела Ґаландова, староста Уліча Ян Голинка і Йозеф Таларовіч.

Жрідло фотоґрафії: Фундація Aevis.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА