Голосник

Польща неприязна меншынам

Орґанізация Економічной Спілпрацы і Розвитку (OECD) опубликувала 2. вересня/септембра рапорт «All Hands in? Making Diversity Work For All», якій тыкат ріжнорідности в державах спільноты. Серед досліджаных держав лем в Польщы і на Мадярах занотувано зменшыня акцептациі ґу трьом специяльным ґрупам: етнічным меншынам, особам ЛҐБT і міґрантам.

В рапорті досліджано предовшыткым тото, як выглядат ситуация на рынку працы ґруп, якы можут быти дискримінуваны з огляду на етнічне походжыня, рід, неполносправніст або вік. В рапорті нашли ся тіж стратеґіі для приватных фірм і публичных інституций, тыкаючы збільшыня ріжнорідности в місци працы.

Польща на третім місци, ідучы од кінця

Важным елементом рапорту были досліджыня односин до ріжнорідности в поєдных державах. OECD покликала ся на своі першы досліджыня, подля котрых отвертіст на міґрантів, акцептация для ЛҐБТ і підтримка для міґрантів сут зо собом повязаны. Авторы рапорту спостерігают, што зміцняня в соспільстві позитивных постав в однесіню до єдных меншын спричынят позитивны поставы в однесіню до інчых дискримінуваных ґруп.

Жебы провірити односины до ріжнорідности, дали звіданя:

Ци місто або реґіон, в котрым жыєш, то добре місце до жытя для:
– нацийональных і расовых меншын,
– ґеів і лесбійок,
– іміґрантів з інчых держав?

Кус більше як половина жытелів держав OECD (55%) думат, што іх околиці то добре місце до прожываня для етнічных меншын, осіб ЛҐБТ і іміґрантів. Польща єст на третім місци, за Мадярами і Турцийом, серед держав найменше приязных меншынам.

Найменше толеранциі взглядом міґрантів

Дальшы ріжниці медже державами видно тіж, коли розділит ся звіданя на три ґрупы. В рапорті мож найти табелю, котра вказує, як в поєдных державах зміняли ся односины до етнічных меншын, ЛҐБТ і іміґрантів. Веце як два процентовы пункты зменшыня ся акцептациі зазначено на червено, збільшыня акцептациі веце як два пункты на зелено, а тото, што помедже – на жолто.

Лем дві державы зарахували зменшыня акцептациі о веце як два процентовы пункты і мают всітри червены поля. То Польща і Мадяры. Вшытко через односины до осіб ЛҐБТ, бо лем в тых двох державах акцептация для них в послідніх 10 роках ся зменшыла.

Вірогідны, невірогідны

Авторы рапорту звертают увагу, што результаты можут быти невірогідны – респонденты могли давати тзв. соспільні пожадану одповід. В примірі квестий, взглядом котрых є консенсус, як примірово рівніст плоти, звідуваны бесідуют радше тото, Чого ся од них жде, як тото, што направду думают.

Дослідникы рекомендуют одчытуваня результатів барже як опіній респондентів про іх найблизше середовиско, а не приватны поставы. Засуґерували тіж, што результаты могли бы быти іщы низшы, коли досліджана была бы опінія представників меншыновых ґруп, а не загальні жытелів даной державы.

В рапорті зазначено, што в державах, в котрых велика част думат, што іх реґіон єст приязный меншынам, інчы досліджыня, роблены серед меншыновых ґруп, часто выказували высокє одчуваня дискримінациі, як прим. в Фінландиі, Нідерландах ци Люксембурґу.

Фот. Аґнєшка Зєльонка, Табір Ушівак – Босня і Герцеґовина 2019.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Штоденньо од 11.00 год. веде lifestyle'овый проґрам «Пачісна година» , а в суботы о 9.00 год. чытат для Вас порталь. Контакт: natalia@lem.fm

Коментарі