Портал сомборьского радія інформує і по русиньскы

Уж веце як місяць портал сомборьского радія Novi Radio Sombor приность текстовы вісти і в русиньскім языку. Сербске місто Сомбор находить ся на граніці з Хорватійов у автономній области Войводина, в котрій жыє русиньска народностна меншына.

Редакція порталу інформаціями в русиньскім языку росшырила языковы мутації денных вістей, котры уж передтым на сайті появляли ся окрім сербского языка так само по мадярьскы і в языку бунєвской народностной меншыны. Перша вість по русиньскы была публікована 18-го юна 2018-го року. Вісти писаны по русиньскы приготовлює довгорічна скушена новинарька Олена Живковіч. Інформації затля не прибывають каждый день, но дотеперь мали статі публікованы по русиньскы понад 11 тісяч чітателів.

У першій статі, котра оголошала зачаток інформованя по русиньскы, редакція по сербскы пояснила чітателям порталу, хто суть Русины, де у Войводині жыють, яка є їх містна сімболіка і коли мають своє народне свято. В тексті ся далше пише, же русиньскы статі не будуть служыти лем Русинам, а так само послужать, жебы годны были іншы чітателі дізнати ся о жывоті і діялности той меншыны в Сербії. Редакція то подля властных слов робить подля гесла: Вшыткы сьме єдно, мотта: Лем позітівно, і ціля: Зближованя.

Хоць портал радія Novi Radio Sombor не хоснує сербску кірілицю у своїх статях, а штораз меджі Сербами популарнішу латиніку, русиньскы статі вырішыла редакція писати кіріліцьов, жебы як інформовала дотримати норму, в котрій є русиньскый язык кодіфікованый.

У Сербії офіціално з підпоров державного бюджету діє русиньске выдавництво Руске Слово, котре выдавать по русиньскы писаный тыжденник з єднаков назвов, далше часопис про дітей Заградка, часопис про молодеж МАК і науковый журнал Шветлосц. Руске Слово выдавать і книжкы. Так само має і свій інтернетовый протал, на котрім по русиньскы інформує аґентура Рутенпрес. Окрім того мають Русины в Сербії своє властне высыланя в державній телевізії і в радію.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА