Конец вакаций означат поворот до штоденности, а тота найчастійше вяже ся з доіздами, напр. до школы або роботы. На бескідскы дорогы вертают поізды оферуючы публичный громадный транспорт.
На переізды державным публичным транспортом од років неє што рахувати. Автобусовы получыня Державной Автомобільной Комунікациі фурт зникают з розкладів. Державный публичный транспорт має ся планно, што выкорыстуют приватны компаніі.
Од вересня/септембра автобусом з Ґладышова до Ґорлиц
Єдна з транспортовых фірм з ґорлицкого повіту – Ліброполь, одкрыват од 1. вересня/септембра реґулярны получыня на двох трасах: Тяжковиці-Фалькова-Тяжковиці та Ґладышів-Ґорлиці-Ґладышів. Як подає Ліброполь, новы комунікацийны леніі будут урухомлены зато, што фірма доставала вельо інформаций од пасажерів, же сут потрібны додатковы трасы. Запропонуваны были конкретны годины курсів, што дадут можливіст штоденно доіхати о розмаітых порах до шкіл, роботы ітп., але розклад може быти іщы зміненый, о кілько такы будут потребы пасажерів.
Автобус з Ґладышова до Ґорлиц буде выізджал о год. 6.40 рано. Курсувал буде в дни шкільной наукы, а по дорозі затримувал ся буде на пристанках Маластова, Санковой, Сяр і Ґорлиц. Година повороту з Ґорлиц до Ґладышова буде дост скора, бо автобус рушыт о год. 15.23. Є тіж получыня з Ясюнкы через Панкну, Маластів до Ґорлиц і назад. З того села автобус іздит двакратні: о год. 6.55 та 12.05. Інча траса, на якій ходят автобусы той фірмы, веде з Маластова через Вапенне до Ґорлиц. На тій трасі получынь є більше.
До Ставишы, Ізб, Высовой, aж і над море, але не до Бортного
На захід од Ґорлиц мож доіхати до розмаітых місцевости, хоснуючы оферту інчой компаніі. Є то фірма Voyager Transport. На сайті той транспортовой компаніі мож найти м.ін. чысленны получыня з Ґрибова через Фльоринку, Поляны до Крениці, з Ґорлиц через Ропу, Климківку, Ганчову до Высовой. Окрем того двараз на ден курсуют бусы зо Ставишы до Ґрибова, з Устя Руского до Ізб та з Ґорлиц через Білянку, Брунары до Ізб. Фірма має на розкладах і далекы получыня, прим. на трасах: Крениця-Варваша-Колобжеґ ци Краків-Новый Санч-Высова.
Хоц видит ся, што получынь з Ґорлицями є барз вельо, то фурт без комунікациі остає долина, в котрій розлокуваны сут Бодакы і Бортне. Подля актуального розкладу ізды розмаітых фірм, ниякій автобус ци бус не доізджат в долину Бортнянкы. Не доіхаме тіж до Рыхвалду, Новиці ци Конеченой.
Коментарі