Право і Справедливіст хоче знести привілегіі для меншын

До Конституцийного Трибуналу трафил внесок, в котрым заскаржене єст звільніня комітетів нацийональных меншын з выборчого порогу.

Парляментаристы клюбу Право і Справедливіст квестийонуют перепис, подля котрого комітеты нацийональных меншын звільнены сут з выборчого порогу в выборах до Сойму. Такій внесок зложыли до Конституцийного Трибуналу. «Принцип рівности выборів не передвидує вынятків» – подают послы з ПіС, репрезентуючы внескодавців.

Подля внескодавців «брак єст арґументів на хосен особливого трактуваня комітетів нацийональных меншын в выборах до Сойму. Розвязаня, котре находит ся в арт. 197 пар. 1 Выборчого кодексу, має анахронічный характер і видит ся быти оперте на заложыню, же нацийональны меншыны повинны быти репрезентуваны в Соймі без огляду на чысло голосів здобытых в скали державы» – чытаме в поясніню внеску поміщеного на сайті Конституцийного Трибуналу.

Іде о запис, котрый бесідує, же комітеты нацийональных меншын не мусят осягнути 5 процентів одданых голосів в скали державы, кєд зложат Державній Выборчій Комісиі освідчыня в тій справі.

Авторы внеску, якых іменно репрезентуют в тій справі посол Януш Ковальскій і Кжыштоф Щуцкій з ПіС, переконуют, што «з увагы на факт браку вымогу осягніня 5 проц. порогу через выборчы комітеты основаны выборцями зосередженыма в зареґіструваных меншыновых орґанізациях реальна вартіст голосу одданого на такій комітет може вказати ся о вельо сильнійша як на інчы комітеты, котры в скали державы здобыли такє же або векше чысло голосів, але з огляду на брак звільніня з вымогу осягніня 5 проц. не вошли до Сойму» – арґументуют.

Посольскій внесок отримал сиґнатуру Конституцийного Трибуналу. Неє покля што терміну його розсмотріня.

Для порівнаня подаєме два приміры, як выглядают переписы в інчых европейскых державах в однесіню до меншыновых кандидатів на послів. З перекрочыня порогу 5 проц. звільнены сут выборчы спискы кандидатів меншыновых самосправ на Мадярах. Окрем того інституция, котра зголашат кандидатів на даным списку, має право до єдного мандату в парляменті, кєд здобуде што найменше четвертину квоты Гера, а кєд єй не осягне, має право мати парляментарного омбудсмана.

Зас конституцийні заґарантуване право до репрезентациі з низшій ізбі парляменту мают нацийональны меншыны в Румуніі. Правильні зареґіструваны партиі і культурны орґанізациі, якы репрезентуют ріжны меншыны (тепер єст іх вісемнадцет), можут мати по єдным послі в парляменті, о кілько здобудут одповідник парох тисячів голосів.