Православны путували з Конечной на Св. Гору Явір та прятали цмонтір в Ріпках (фотореляция)

В днях 10.-12. липця/юлия т.р. проходило православне поломництво на Святу Гору Явір. Поломникы вышли в неділю (10.07) з Конечной, де наперед была служена Свята Літургія в місцевій церкви св. Василия Великого, а пак конечняне погостили охочых сніданьом. Божеску Літурію в тот ден правили опікун Братства Православной Молодежы перемышльско-новосандецкой єпархіі – о. Андрий Ґрич, та парох Ґладышова, Реґєтова, Ждыні та Конечной – о. Аркадий Бараньчук. Вчас проповіди духовны звернули увагу на потребу путуваня, споминаючы при тым на долгу традицию поломництв на Св. Гору Явір, ачий тых сперед 1947 рока, а пак по повороті Лемків на рідну землю. Дальше о. Бараньчук напомнул, же штораз частійше поломництва выглядают радше як автокаровы прогулькы, а не так, як давно – пішы путуваня до святых місц. Хоц оне поломництво было направлене головні на молодіж, отці закликали вірных, жебы не лем іх діти ходили піше на Гору Явір, але і з рока на рік самы долучали до них.

Выходячы з Конечной до Реґєтова, поломникы затримали ся на короткій час на цмонтери з І Світовой Войны, котрий горує над селом. Гын, де спочывают вєдно австрийскы та росийскы жолніры, путуючы одспівали Вічну Памят. Дальше, уж через лісний пут, дішли до неістнуючого днес села Реґєтів Выжній, а одтамале на молебен до церкви св. Михала в Реґєтові (давно – Нижнього). Пак, по короткій молитві вшыткы были запрошены на полуденок до єдной з реґєтівскых родин.

Потім асфальтовом дорогом поломництво перешло через Шквіртне до Ганчовы, де в церкви Покровы Пресвятой Богородиці одлужено молебен. Кінцом дня поломникы дішли до ганчівской рільничой школы, де зрыхтуване было місце іх одпочынку.

В другій ден православного поломництва молодіж з о. Марком Ґоцко з Команчы пішла до сусідніх Ріпок, де упорядкували тамтышній цмонтір. Хоц село Ріпкы істнує, церков, котра колиси там стояла, днес находит ся в Музею Народного Будівництва в Саноку, зато вірны і сам цмонтір приналежат до православной парохіі в Ганчові. Попрятавшы цмонтір, вірны одслужыли панихіду на місци, де стояла спомнена церков Рождества Пресвятой Бородиці з 1801 рока, а о 17.00 год. в ганчівскій церкви зачала ся Всеночна, котру очелил владыка Паісий, єпископ ґорлицкій, при присутности чысленного духовеньства і вірных. Вечером, молодіж гостила в єдній з ганчівскых родин, де одбыло ся ґрілюваня.

В сам праздник свв. Апостолів Петра і Павла поломникы о 7.00 год. взяли участ в Молебни в Ганчові, а пак піше рушыли до Высовы, одкале, по привитаню владыкы Паісия, вышли на святу гору, де по святочній Божескій Літургіі был освячений крест, традицийні несений поломниками через цілу трасу поломництва.