Председа СКР просив Порошенка о вето

В повязаню із новым україньскым законом о освіті, котрый є крітікованый політнчныма представителями дакілько держав, загнав писмо презідентови Україны Петрови Порошенкови і Штефан Лявинець, председа Світового конґресу Русинів (СКР).

Писмо є з датов 8-го септембра 2017-го року і жадать ся в нім презідентово вето. Міджічасом презідент новый закон підписав.

Председа СКР і єдночасно і Світовой рады Русинів, як выконного орґану конґресу, такой на зачатку свого писма пише, же новый Закон о освіті протиречіть Европскій харті реґіоналных або меншыновых языків, Закону о народностных меншынах на Україны і міджінародным договорам, котры підписала Україна зо сусідніма державами.

Лявинець звертать увагу презідента на окремы міджінародны договоры, котры має Україна підписаны, і з котрых має Київ обовязкы, якы суть новым законом порушованы. Так само цітує окремы статі Конштітуції Україны і закона о меншынах, котры ґарантують права народностных меншын.

„Беручі тото до увагы, Світовый конґрес Русинів обертать ся на презідента Україны Петра Порошенка з просьбов ветовати приятый Закон о освіті, або го вернути Верьховній раді Україны з оправами,“ закінчує писмо Лявинець.

Цілый текст писма председы Світогово конґресу Русинів Штефана Лявинця до презідента Україны собі можете прочітати під статьов.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА