Голосник

Председа словацького парламенту ся оправдав Ґрекокатолицькій церькви за зрушіня комуністами

Председа Народной рады Словацькой републікы Борис Коллар ся офіціално оправдав Ґрекокатолицькій церькви за їй протизаконне зрушіня перед 70-ма роками.

Зробив так при нагоді 70-ой річніці заказу Ґрекокатолицькой церькви в бывшій Чехословакії такзваным Пряшівскым собором в рамках святочного одкрытя памятной таблы ґрекокатолицькому єпіскопови Павлови Петрови Ґойдічови на будові вязніці в Леополдові, котре одбыло ся в понедільок 25-го мая 2020-го року. Інформовала о тім аґентура TASR.

Мало то прийти вже скоріше

„Кедь сама держава одыйде із пути почливости, справедливости, а головно людьскости, за мурами вязніць ся не знайдуть лем выконователі злочінів, але і тоты, котры собі заслужать тоты найвысшы честованя,“ повів Коллар на святочній події.

„Окремо думаме на єдного з них, котрый у тій вязніці вмер перед 60-ма роками, бо зістав вірный вшыткому, што творило його жывотны вартости. Вірив тому, же добро в людях є так глубоке, же наконець переможе. Зістав вірный Богу, своїй церькви, але головно свому сумліню. Выбрав собі зато терпіня і смерть, намісто зрады самого себе. Про ґрекокатолицького єпіскопа Павла Петра Ґойдіча была найвысшым прінціпом фунґованя свята любов до ближного,“ продовжовав председа Народной рады.

Як далше одзвучало в приговорі Бориса Коллара, єпіскоп і Ґрекокатолицька церьков вже были регабілітованы. Но річніця собору, котрым комуністічны власти зрушыли церьков, подля Коллара давать принагоду на выконаня ґеста, котре за його словами мало быти зроблене вже омного скоріше.

„Як председа Народной рады Словацькой републікы із нагоды 70-ой річніці зрушіня Ґрекокатолицькой церькви в бывшій Чехословакії і 60-ой річніці мученицькой смерти їй єпіскопа Павла Петра Ґойдіча в тій вязніці, выражам Ґрекокатолицькій церькви на Словакії репрезентованій їй найвысшыма представителями офіціалне оправданя за протизаконне і недемократічне поставліня мімо закон,“ повів Коллар.

Оправданя вшыткым, котрых права были порушованы

Председа парламенту ся оправдав і вшыткым людям, котрых основны права были в тім часі значно пошкоджены державныма властями.

„Оправдам ся так само вшыткым словацькым гражданам, котрым державны власти одняли права, вкрали маєток, позбыли достойности і взяли то найцінніше – жывот.“

Жрідло фотоґрафій: Борис Коллар.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі