Председа влады Войводины поздравив Русинів з їх святом
Міровіч хоче просаджовати політіку єдности і підпроы.
17-ый януар каждый рік святкує ся як День Русинів Сербії. Тот рік з нагоды празднованя нашого свята в Сербії заґратуловав Русинам і председа Покраїньской (автономной) влады Войводины Іґор Міровіч. Інформовав о тім портал Радіо-Телевізія Войводины.
За словами Міровіча, влада Войводиньской автономной области буде і далше підтримовати сохраніня языка, културы і звычаїв русиньской народностной меншыны. Міровіч повів, же богата културна дідовизна і традіції русиньского народа суть частьов сполочных цінностей, котры на тій теріторії плекають Сербы і Русины.
„Політіка єдности і підпоры є політіков, котру будеме просаджовати і в слідуючім часі,“ пише ся в поздоровліню председы войводиньской влады Іґора Міровіча.
Святкованя народного праздника в Сербії проходять од понеділька 17-го януара 2022-го року, і закінчать ся в неділю 23-го януара. Почас тыждня проходять многы події присвячены Дню Русинів Сербії в селах і містах, де жыє русиньске населіня.
В неділю одбудуть ся централны святкованя в Новім Саді, котрый тот рік може гордити ся тітулом Европске головне місто културы.
Проґрам почне в пізных пополідняйшых годинах в літурґійов у Ґрекокатолицькій церькви свв. апостолів Петра і Павла в Новім Саді, пак буде продовжовати выставов у фоає Сербского націоналного театру. Якраз новосадьскый театер буде і місцьом, де о восьмій годині вечур одбуде ся святочный ґалапроґрам.
День Русинів Сербії є встановленый на 17-тый януар із нагоды припоминаня собі дня, коли у 1751-ім році радник Марії Терезії і адміністратор Кральовско-державного Бачского діштрікту в Зомборі Франц Йозей де Редл підписав першый урядный документ – Контракт о насельованю 200 русиньскых ґрекокатолицькых родин зо Земпліна до втогдышнього Великого Керестура.
Тот день бере ся за день насельованя Русинів на тоты теріторії. Дата Дня Русинів Сербії прияла ся у 2007-ім році, і першый раз праздник святковали у 2008-ім році.
Жрідло фотоґрафії: Покраїньска влада.
ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА
Повязаны дописы
Ґорлиці 106,6 MHz
Наш порталь можете чытати чысто дармо, але кєд маш охоту - можеш нас спомочы. Буде нам барз мило!
Жебы спомочы нас даком вплатом, без ниякых зобовязань, втисний притиск або зоскануй код QR.
Nasz portal jest darmowy, nie mamy (i nie chcemy) na nim reklam. Jeżeli masz ochotę - możesz wesprzeć naszą codzienną pracę.
Aby wspomóc nas jednorazową wpłatą, bez żadnych zobowiązań, kliknij przycisk lub zeskanuj kod QR.
